भांगरभूंय | प्रतिनिधी
बागलकोट : गोंयांतूच न्हय, तर सगलेच कडेन हातांत चार पयशे आयले काय पार्टी करपाची, फिरपाक वचपाची, भायर खावपाक वचपाची इत्सा सगल्यांकूच जाता. खास करून खोशेच्या खिणां वेळार तर पार्टी करपाची उमेद सगल्यांकूच आसता. मात कर्नाटकांत एका भुरग्याक धावेचे परिक्षेंत मेळिल्ल्या अपेसा खातीर सुवाळो जालो. ताणें प्रामाणीकपणान अभ्यास केल्लो, पूण तो नापास जालो. ताच्या पालकांनी ताच्या अपेसा खातीर पार्टी दिली. ताचे व्हिडियोय व्हायरल जाल्यात.
अभिषेक अशें ह्या भुरग्याचें नांव. तो बागलकोटांत खाजगी शाळेंत शिकता. ताका ६२५ मदले २०० गुण पडले. धावे यत्तेच्या एकाय विशयांत तो पास जावंक ना. मात ताका तापोवचे बदला, पालकांनी तो निरशेवचो न्हय, म्हूण पार्टी आयोजीत केली. तांणी गुण बी घाल्लो केक मागयलो. मिठाय मागयली. लागींच्या सोयऱ्यांक आपयले आनी घरचे घरा सुवाळो केलो. फुडले फावट पास जावपाचो यत्न कर, अशें ताका सगल्यांनी सांगलें.
ताच्या बापायन सांगलें, अभिषेकान प्रामाणीकपणान अभ्यास केलो. ताणें परिक्षा गंभीरपणान घेतिल्ली. मात ताका गुण पडलें नात. ताका निरशेवणी येवची न्हय, म्हूण आमी हो सुवाळो आयोजीत केलो. ह्या वेळार अभिषेकान सांगलें की, फुडल्या यत्नांत हांव सगल्या विशयांत पास जातलों.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
