भांगरभूंय | प्रतिनिधी
पणजी : केपें म्हालांतल्या पेडामळ-शिरवयच्यान काळजाक पीळ घालपी घडणूक मुखार आयल्या. हांगच्या कानालांत बुडून ९ वर्सां पिरायेचे चलयेक मरण आयलें. ही घडणूक काल ४ मेक घडली. ताचें नांव शेहेद शेख.
हातांत आयिल्ले म्हायती प्रमाण, चलयेचें कुटूंब पेडामळ-शिरवय आपल्या सोयर्यांच्या घरा लग्नाक आयिल्लें. सांजेवेळार हें चली आपल्या घरच्यांची नदर चुकोवन घरा लागसारा आशिल्ल्या कानाला कडेन गेलें. जायतो वेळ जालो चली दिसूंक ना म्हणून घरच्यांनी ताका सोदलें. मजगतीं, सुमार अडेज वरानी ताची कूड लागसारच्याच पोप जॉन स्कुला लागसारा दिसली. हे विशीं थळाव्यांन केपें पुलिसांक सांगलें. तांणी पंचनामो करून कूड पोस्टमार्टमा खातीर धाडली. फुडलो तपास पुलीस करतात.
मजगतीं, कालूच बागा-कळंगुटे एक ६ वर्सां पिरायेची चली बुडली.
फाटल्या कांय काळांत गोंयच्या विवीध वाठारांनी खुबश्या ल्हान भुरग्यांक उदकांत बुडून मरण आयलें. ही सध्या हुस्को करपा सारकी गजाल. मार्च २०२४ त एक पांच वर्सां पिरायेच्या चल्यान पणजे स्विमिंगपुलांत बुडिल्ल्यान जीव वगडायलो. एप्रील २०२५ त दोन वर्सांच्या चल्याक रुमडामळच्या उक्त्या गटारांत पडून मरण आयलें. तशेंच कुडचडें, काकोडाच्या साळावले धरणाच्या कानालांत दोगां भुरग्यांक बुडून मरण आयिल्लें.
सुरक्षिततायेचे नदरेन उपाय करप गरजेचें
गोंय राज्य बालहक्क संरक्षण आयोगान २०१७ सावन स्विमिंगपुलांत बुडून ८ बाळकांक मरण आयिल्ल्याचें नोंद जालां, सुरक्षीततायेचे नदरेन उपाय येवजण्यो वाडोवपाची शिफारस केल्या. आयोगान स्विमिंगपुलांत प्रशिक्षीत जीवनरक्षकांची नेमणूक आनी ल्हान भुरग्यां खातीर योग्य सुरक्षात्मक उपकरणांची उपलब्धताय सुनिश्चीत करपाची गरज उक्तायली.
मजगतीं, पालकांनी आपल्या भुरग्यांचेर सेगीत लक्ष दवरप गरजेचें. तशेंच प्रशासनान भौशीक सुवातांचेर सुरक्षिततायेच्यो उपाय येवजण्यो वाडोवपाची मागणी लोक करीत आसतात. स्विमिंगपूल, कानाल, गटारां आनी दर्यादेगांचेर योग्य शिटकावणी तखटे, जीवनरक्षकांची नेमणूक आनी सुरक्षात्मक उपकरणांची उपलब्धताय सुनिश्चीत करप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
