स्ट्रॅटोस्फेरिक एअरशिप प्लॅटफॉर्माची चांचणी येसस्वी
भांगरभूंय | प्रतिनिधी
नवी दिल्ली, खबरां संस्था ः भारतीय संरक्षण संशोधन आनी विकास संघटणेन (DRDO) मध्य प्रदेशांतल्या श्योपूर चांचणी स्थळा वयल्यान ‘स्ट्रॅटोस्फेरिक एअरशिप प्लॅटफॉर्माची’ पयली उड्डाण चांचणी येसस्वीपणान केली. आग्राच्या डीआरडीओच्या एरियल डिलिव्हरी रिसर्च अँड डेव्हलपमेंट एस्टॅब्लिशमेंट (ADRDE) हे संस्थेन हें विमान तयार केलां. हें विमान इन्स्ट्रुमेंटल पेलोड सयत 17 किमी उंचायेचेर उडयलें. हें विमान 62 मिनटां उडलें.
ह्या कामगिरी विशीं म्हायती दितना संरक्षण मंत्रालयान सांगलें, डीआरडीओन श्योपूरांतल्या ह्या स्ट्रॅटोस्फेरिक एअरशिप प्लॅटफॉर्मची पयली चांचणी येसस्वीपणान पुराय केली. उड्डाणा वेळार विमानांतलो दाब नियंत्रित दवरपी प्रणाली (Enclosure Pressure Control) आनी आपत्कालीन स्थितींत हवेक भायर सोडपी प्रणाली (Emergency Deflation System) हांचीय चांचणी केली. चांचणी पुराय जाले उपरांत ही यंत्रणा सुरक्षीतपणान परतून हाडली.
खूब उण्या देशांनी हें तंत्रज्ञान आसा….
डीआरडीओन सोशल मिडिया प्लॅटफॉर्म ‘एक्स’चेर बरयलां, हवे परस हलकी ही प्रणाली भारताची धर्तरेचें निरिक्षण, गुप्तचर म्हायती एकठांय करप, नदर दवरप आनी टोही (आयएसआर) क्षमताय खूब वाडयतली. ह्या येसस्वीपणाक लागून भारताक हें देशी तंत्रगिन्यान आशिल्ल्या देशांच्या वळेरेंत सुवात मेळ्ळ्यां.
संरक्षण मंत्री राजनाथ सिंग हांणी ह्या व्हड कामगिरी खातीर डीआरडीओक परबीं दिल्या. ही पद्दत भारताची आयएसआर क्षमता खूब घटमूट करतली आनी देशाक संरक्षण क्षेत्रांत तंत्रीक नदरेन आत्मनिर्भर जावपाचे दिकेन व्हरतली अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
