भांगरभूंय | प्रतिनिधी
नवी दिल्ली, खबरां संस्था ः पहलगाम आतंकवादी हल्ल्या उपरांत आतां पाकिस्तानी हॅकर्सांनी सायबर हल्ल्या वरवीं भारतीय युजर्सांची ऑनलायन फटवणूक करपाक सुरवात केल्या. ह्या हल्ल्यांनी युजर्सांचे संगणक, लॅपटॉप आनी फोनाचेर टार्गेट करतात.
प्रसार माध्यमांच्या खबरां प्रमाण, पाकिस्तानी हॅकिंग गट ‘ट्रान्सपरंट ट्रायब’ क्रिमसनरॅट नांवाचो मालवेयर पातळावपाचो यत्न करता. हातूंत अश्यो फालयीं धाडटात ज्यो सरकारी फायलीं सारक्यो दिसतात, पूण भितर फिशिंग लिंक्स लिपयिल्ल्यो आसतात. ‘पहलगाम आतंकवादी हल्लो अपडेट’ सारकिल्या विशयांक घेवन ह्यो फायली धाडटात. ह्यो फायली उगडून हॅकर्स सिस्टमांत घुसून म्हायती चोरूंक शकतात.
आतां मेरेन सुमार 10 लाखां परस चड सायबर हल्ले
पाकिस्तानी सायबर हॅकर्स भारतांतल्या सरकारी संस्थांच्यो आनी कंपनींच्यो वेबसायटी हॅक करपाचो यत्न करतात अशी खबर 1 मेक आयल्ली. प्रसार आतां मेरेन सुमार 10 लाखां परस चड सायबर हल्ले जाल्यात. ह्या हल्ल्यांत हॅकर्सांनी संरक्षण, शिक्षण, दूरसंचार आनी येरादारी क्षेत्रांक टार्गेट केलें.
अहवाला प्रमाण, ह्या सायबर हल्ल्यांतले चडशे हल्ले पाकिस्तानांतल्यान जाले आनी जायते हल्ले बांगलादेश, मोरोक्को आनी मध्य उदेंतांतल्या देशांतल्यानय जाले. संवेदनशील डेटा चोरून गुप्तचर हेरगिरी करपाच्या हेतान हॅकर्सांनी राश्ट्रीय सुरक्षा मोडपाचो यत्न केलो. तशेंच ह्या हॅकर्सांनी निवृत्त सैनिकांच्या भलायकी जतनाय संबंदीत वेबसायटी हॅक करपाचो यत्न केलो.
29 एप्रिलाक पाकिस्तानी हॅकर्सांनी रानीखेत आनी श्रीनगरांतल्या आर्मी पब्लिक स्कूलांचीं वेबसायट हॅक करपाचो यत्न केलो. ह्या वेबसायटींक आयओके नांवाच्या हॅकरान टार्गेट केल्लें. ताचेर प्रक्षोभक मजकूर अपलोड केल्लो. ते भायर आर्मी वेलफेयर हावसिंग ऑर्गनायझेशन (AWHO) आनी इंडियन एअर फोर्सचे प्लेसमेंट पोर्टल हॅक करपाचो यत्न जालो. पूण हे सायबर हल्ले रोखडेच थांबयले. तशेंच ह्याच दिसा राजस्थान शिक्षण खात्याची वेबसायट पाकिस्तानी हॅकर्सांनी हॅक केल्ली. ‘पाकिस्तान सायबर फोर्स, फुडलो हल्लो गुळयांनी न्हय तर तंत्रगिन्यानान जातलो’ अशें वेबसायटीच्या मुखेल पानाचेर बरयलां.
28 एप्रिलाक पाकिस्तानी हॅकर्सांनी स्वराज्य आनी शार उदरगत खातें (DLB) आनी जयपुर उदरगत प्राधिकरण (JDA) हांचीं संकेतथळां हॅक केल्लीं. पहलगाम हल्ल्या कडेन संबंदीत एक पोस्टूय थंय घाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
