भांगरभूंय | प्रतिनिधी
आझिलोंत उपचार घेवपी ६ जखमींक डिस्चार्ज
पणजी : शिरगांव खेटाखेटींत जखमी जाल्ल्यां मदीं दोगां जाणांची भलायकी आजूनय गंभीर आसा. तांचेर गोंय वैजकी महाविद्यालय हॉस्पिटलांत उपचार सूरू आसात. दोगांची भलायकी सुदारल्या. तांच्या जिवाक आतां कसलोच धोको ना. म्हापशेंच्या आझिलो हॉस्पिटलांत उपचार घेवपी ८ जखमीं मदल्या ६ जाणांक डिस्चार्ज दिला. राज्याचे भलायकी सचीव अरूणकुमार मिश्रा हांणी ही म्हायती दिली.
शिरगांवां शेनवारा सकाळी जाल्ले खेटाखेटींत ६ जाणांक मरण आयिल्लें, जाल्यार सुमार ८० जाण जखमी जाल्ले. जखमींचेर सांखळे, दिवचल भलायकी केंद्रा सयत म्हापशें आझिलो आनी गोंय वैजकी महाविद्यालय हॉस्पिटलांत उपचारा खातीर दाखल केल्ले. जीएमसींत शेनवारा १३ जखमींक दाखल केल्ले. शेनवारा ह्या मदल्या ४ जाणांची भलायकी सामकी गंभीर आशिल्ली. आयज आयतारा ४ जाणां मदल्या २ जखमींची भलायकी सुदारल्या. दोगांची भलायकी आजूनय गंभीर आसा. खासा दोतोरांची समिती तांचेर उपचार करता. आझिलो हॉस्पिटलांत आजूनय दोन जखमींचेर उपचार सुरू आसात. तांची भलायकी सध्या सुदारल्या.
खेटाखेटीचे घडणुके उपरांत भलायकी मंत्री विश्वजित राणे हांणी भलायकी सचिव अरूणकुमार मिश्रा, गोंय वैजकी महाविद्यालय हॉस्पिटलाचे डीन डॉ. शिवानंद बांदेकार, वैजकी अधीक्षक डॉ. राजेश पाटील, खास अधिकारी डॉ. राजनंदा देसाय आनी हेर विभाग मुखेल्यांची बसका घेतली. हे बसकेंत भलायकी गंभीर आशिल्ल्या जखमींचेर उपचार करपा खातीर डॉक्टरांचे पंगड व्हेले. हे पंगड गंभीर जखमींच्या उपचारांचेर लक्ष दवरून आसात, अशी म्हायती अरूणकुमार मिश्रा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
