भांगरभूंय | प्रतिनिधी
बोर्ड म्हणटा- मालमत्ता २०१३ वर्सा नोंदणीकृत; केंद्राचो दावो- ११ वर्सांनी मालमत्तेंत ११६% वाड
नवी दिल्ली, खबरां संस्था ः ऑल इंडिया मुस्लिम पर्सनल लॉ बोर्डान वक्फ प्रकरणांत केंद्रान सर्वोच्च न्यायालयांत चुकीचो डेटा सादर केल्ल्याचो गंभीर आरोप केलो. बोर्डान १ मे दिसा सर्वोच्च न्यायालयांत दाखल केल्ल्या प्रतिज्ञापत्रात म्हणलां, पोर्टलार दाखयिल्ल्यो सगल्यो मालमत्ता २०१३ वर्साच नोंदणीकृत आशिल्ल्यो. केंद्राच्या प्रतिज्ञापत्रांत हाचो उल्लेख नाशिल्ल्यान, मंडळान ताका ’फटींग प्रतिज्ञापत्र’ म्हणलें. तशेंच अल्पसंख्याक वेव्हार मंत्रालयाच्या वतीन सोपूतपत्र दाखल करपी अधिकार्यांचेर कारवायेची मागणी केल्या.
केंद्रान २५ एप्रिलाक आपल्या प्रतिज्ञापत्रांत म्हणिल्लें, २०१३ मेरेन वट्ट वक्फ मालमत्ता १८ लाख २९ हजार १६३.८९६ एकर आशिल्ली. २०१४ ते २०२५ ह्या ११ वर्सांनी तातूंत २० लाख ९२ हजार ७२.५६३ एकर (११६%) वाड जाली, म्हळ्यार २०२५ वर्सा वट्ट वक्फ मालमत्ता ३९ लाख एकर परस चड जातली. ह्या प्रकरणाची सुनावणी फाल्यां ५ मे दिसा जातली.
केंद्राच्या प्रतिज्ञापत्राक बोर्डान दुबावीत म्हणलें
बोर्डान म्हणलें, अशें दिसता- केंद्र सरकार तांच्या प्रतिज्ञापत्रांत म्हणटात, २०१३ पयलीं नोंदणीकृत जाल्ली वक्फ मालमत्ता वक्फ वेवस्थापन पोर्टल सुरू जाले उपरांत रोखडीच अपलोड केल्ली. प्रतिज्ञापत्रांतली ’२०१३ मधील वक्फ प्रॉपर्टीज’ ह्या कॉलमांतल्या मालमत्तांचो आंकडो नोंदणीकृत मालमत्ता म्हणप चुकीचें. अशें दिसता, ज्या अधिकार्यान सोपूत पत्र दाखल केलें ताणें मुद्दम २०१३ वर्साच सगली मालमत्ता पोर्टलाचेर अपलोड केल्ल्याचें नमूद करूंक ना.
सोपूतपत्र दाखल करपी अधिकार्यान अशें नमूद करचें, पोर्टलाचेर दाखयिल्ली सगली मालमत्ता २०१३ वर्साच नोंदणीकृत जाल्ली. प्रतिज्ञापत्रांत हो म्हत्वाचो पैलू सोडला, हाका लागून ताचेर दुबाव आसा.
केंद्रान वक्फ ही धर्मनिरपेक्ष संस्था मानिल्ली
वक्फ काळा प्रमाण विकसीत जाल्या आनी ती फकत धर्मीक संस्था आनी पुजा सुवातीं मेरेन मर्यादीत उरूंक शकना असो सरकाराचो वाद आशिल्लो. पोरन्या निर्णयांचो उल्लेख करून सरकारान वक्फ ही धर्मीक संस्था न्हय तर धर्मनिरपेक्ष संस्था अशें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
