भांगरभूंय | प्रतिनिधी
काँग्रेसीची मागणी : जात्रेंत नियोजन नाशिल्ल्याचें म्हणणें
भांगरभूंय । प्रतिनिधी
पणजी : शिरगांवचे जात्रेंत घडिल्ले घडणुकेची सरकारी अधिकारीच चवकशी करतले जाल्यार तातूंत कांयच निश्पन्न जावचें ना. ताका लागून ह्या प्रकरणाची उच्च न्यायालयाच्या निवृत्त न्यायाधिशां वरवीं चवकशी जावपाक जाय, अशी मागणी काँग्रेसीचे गोंय प्रभारी माणिकराव ठाकरे हांणी केली. शेनवारा पणजे घेतिल्ले पत्रकार परिशदेंत ते उलयताले. ह्या वेळार प्रदेशाध्यक्ष अमीत पाटकार, विरोधी पक्ष फुडारी युरी आलेमांव, खासदार विरियातो फर्नांडीस आनी हेर मानेस्त हाजीर आशिल्ले.
ठाकरे हांणी सांगलें, शिरगांवचे जात्रेंत 50 हजारां परस अदीक लोक उपस्थीत आशिल्ले. अश्या वेळार सरकारान थंय बंदोबस्त खर दवरप अपेक्षीत आशिल्ले, मात थंय कसलेंच नियोजन नाशिल्ल्याचें स्पश्ट जालां. थंय आपत्ती वेवस्थापनाचो, सीसीटीव्ही कॅमेऱ्यांचो उणाव आशिल्लो. थंयचो रस्तो अशीर आसा हें खबर आसून लेगीत सरकारान कसलीच उपाय येवजण करूंक ना. आतां सरकार आपल्या अपेसाचें खापर धोंडांचेर फोडटा. हाका धोंड जापसालदार आसा अशें म्हणून आपली जापसालदारकी फाफुडटात.
मात सरकाराक सामान्य लोकांच्या प्रस्नांच्यो जापो दिवच्यो पडटल्यो. थंय गरजेच्यो सुविधा, बंदोबस्त, नियोजन नाशिल्ल्यानूच ही घडणूक घडल्या. सरकार फकत स्वताचो फायदो पळयता. तांकां लोकां विशीं देणें-घेणें कांयच ना. सरकार पुराय तरेन सगळे बाबतींत अपेशी थारलां. गोंयांत कायदो आनी सुवेवस्था उरूंक ना. तरी लेगीत सरकार लोकांक फटयता. अश्या सरकाराक आनी ताच्या मुखेल्याक पदाचेर रावपाचो नैतीक अधिकार ना, अशें ठाकरे हांणी सांगलें.
‘मरण आयिल्ल्यांच्या घरच्यांक 20 लाख दिवचे’
सरकारान जाहीर केल्ली लुकसाण भरपाय सामकीच उणी आसा. सरकारान मरण आयिल्ल्यांच्या घरच्यांक 20 लाख रुपया, गंभीर जखमींक 10 लाख जाल्यार जखमींक 5 लाख रुपया दिवप गरजेचें आसा, अशें माणिकराव ठाकरे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
