भांगरभूंय | प्रतिनिधी
संदीप जॅकीस : उच्च पांवड्या वयले समिती वतीन तपास सुरू
भांगरभूंय । प्रतिनिधी
दिवचल : शिरगांवां शेनवारा जाल्ले खेटाखेटी उपरांत मुख्यमंत्र्यांनी नेमिल्ले चवकशी समितीन सांजे वेळार शिरगांवां भेट दिवन विवीध कडेन पळोवणी केली. तशेंच वेगवेगळ्या प्रतिनिधीं वांगडा विशेश बसका घेवन तपास सुरू केला
समितीचे अध्यक्ष संदीप जॅकीस, खासदार सदानंद तानावडे, आमदार डॉ. चंद्रकांत शेट्ये, आमदार प्रेमेंद्र शेट, वरिश्ठ पुलीस अधिकारी वर्षा शर्मा आनी हेर अधिकारी, पुलीस पंगड, उपजिल्होदिकारी हांणी घडणुकेचे सुवातेक भेट दिवन पळोवणी केली. ते उपरांत विवीध प्रतिनिधींनी म्हायती एकठांय केली.
शिरगांव देवळाच्या सभाघरांत उच्च पांवड्या वयली बसका जाली. ते बसकेंत सगळे पदाधिकारी, देवस्थान समितीचे पदाधिकारी आनी हेर कांय थळावे लोक हाजीर आशिल्ले. बसकेंत घडणूक नेमकी कशी घडली हाचेर विचार मंथन केलें.
बसके उपरांत पत्रकारां कडेन उलयतना संदीप जॅकीस हांणी सांगलें, आमची समिती जी घडणूक घडल्या ताची खोलायेन चवकशी करता. सगळे वटेन पडटाळणी करपाचें काम सुरू आसा. तपास आनी निश्कर्श हाका एक-दोन दीस लागतले. ते उपरांत आमी निश्चीत निश्कर्शा मेरेन पावतले, अशें तांणी सांगलें.
आमचें काम चालू आसा. सगळ्या वटांनी चवकशी करून घटनाक्रम आनी नेमकी घडणूक कशी जाली, हाचो सोद घेवपाचें काम झुजां पांवड्यार सुरू आसा, अशें संदीप जॅकीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
