भांगरभूंय | प्रतिनिधी
पणजी ः शिरगांवा श्रीलयराई देवीच्या उत्सवा वेळार जाल्ले खेटाखेटींत स जाणांक जीव व्हगडावचो पडलो. जाल्यार जायते जाण जखमी जाल्यात. तांचेर वेगवेगळ्या हॉस्पिटलांनी उपचार चलतात. ह्या वेळार मुख्यमंत्र्यान शिरगांवा वचून थळाची पळोवणी केली. खेटाखेटींत मरण आयिल्ल्यांच्या कुटुंबांक अर्थीक मजत दितले आनी जखमींचेर योग्य उपचार जातले हाची जतनाय घेतले. तशेंच अशी घडणूक परतून घडची न्हय हाची जतनाय घेतले अशें मुख्यमंत्र्यान शिरगांवांत पळोवणी वेळार प्रसार माध्यमां कडेन संवाद सादतना सांगलें.
उत्तर गोंयचे पुलीस अधीक्षक अक्षत कौशल घडणुकेच्या थळार हाजीर आशिल्ले आनी तांणी परिस्थितीचो नियाळ घेतलो. लयराई जात्रेंत खेटाखेट जाली, थंय सुमार एक लाख भक्त हाजीर आशिल्ले. ड्युटीचेर आशिल्ल्या पुलिसांनी रोखडेंच जखमींक उपचारा खातीर हॉस्पिटलांत व्हेले अशें तांणी सांगलें. मजगतीं, जात्रेंतल्या खेटाखेटींत जखमी जाल्ल्यांचेर योग्य उपचार सुरू आसात. गरज पडल्यार भायल्यान दोतोरांक आपोवंक आमी तयार आसात अशें भलायकी मंत्री विश्वजीत राणे हांणी सांगलें.
मजगतीं, गोवा फॉरवर्ड फुडारी विजय सरदेसाय हांणी शिरगांवच्या लयराई जात्रेंत जाल्ली खेटाखेट ही प्रशासनाक पुरायपणान अपेस आयल्या अशी टिका केल्या. हे घडणुकेंत मरण आयिल्ल्यांच्या कुटुंबांक सरकारान बेगोबेग एक कोटी रुपयांची अर्थीक मजत दिवची अशें तांणी जाहीर केल्ल्या व्हिडियोंत आपलें मत मांडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
