भांगरभूंय | प्रतिनिधी
पॅरिस, खबरां संस्था ः पॅरिसांतल्या आंतरराष्ट्रीय स्वयंसेवी संस्था रिपोर्टर्स विदाऊट बॉर्डर्स (RWB) वतीन 2025 वर्साच्या संवसारीक प्रेस फ्रीडम इंडेक्सांत भारत 180 देशांतल्यान 151वे क्रमांकाचेर आसा. फाटल्या वर्सा भारताचो क्रमांक 159वे सुवातेर आशिल्लो. ह्या वळेरेंत इरिट्रिया सकयल आनी नॉर्वे पयल्या क्रमांकाचेर आसा. भूतान, पाकिस्तान, तुर्की, पॅलेस्टायन, चीन, रशिया, अफगाणिस्तान, सिरिया आनी उत्तर कोरिया हांचो क्रमांक भारता सकयल आसा.
संवसारभरांतली माध्यमां निधी उणाव लागून झगडतात. संवसारीक प्रेस फ्रीडम इंडेक्सच्या इतिहासांतल्या सगळ्यांत उण्या पांवड्यार अर्थीक निर्देशांक आसा अशें आरडब्ल्यूबीच्या अहवालांत म्हणलां.
गूगल, अॅपल, फेसबूक, ऍमेझॉन आनी मायक्रोसॉफ्ट ह्या तंत्रगिन्यान कंपनींचे म्हायती संसाधनांचेर वर्चस्व आशिल्ल्यान प्रसार माध्यमांक वाडत वचपी अर्थीक अडचणींक तोंड दिवचें पडटा. आदीं मिडियाचेर वचपी जायरातींचो व्हडलो वांटो आतां ह्या तंत्रगिन्यानाच्या प्लॅटफॉर्मांक दितात.
जायत्या देशांनी प्रसार माध्यमांचेर राजकी फुडाऱ्यांचें नियंत्रण आसा अशें अहवालांत म्हणलां. लेबनॉन, भारत, आर्मेनिया, बल्गेरिया ह्या देशांनी राजकारणी आनी वेवसायीक हांचे कडल्यान मेळपी सशर्त निधीक लागून प्रसार माध्यमां तिगून आसात.
अमेरिकेची क्रमवारी 2 सुवातींनी देंवलीं…
डोनाल्ड ट्रम्प सत्तेर आयले उपरांत अमेरिकेंतल्या प्रेसाची स्थिती बाबत जाल्या अशें अहवालांत म्हणलां. ह्या निर्देशांकांत अमेरिकेचो क्रमांक 57वो आसा, जाल्यार फाटल्या वर्सा ताचो क्रमांक 55वो आशिल्लो. संवसारांतली अर्द्या परस चड लोकसंख्या रावपी 42 देशांनी प्रेस परिस्थिती “खूब गंभीर” आसा. ह्या देशांनी पत्रकारितेचें स्वातंत्र्य चड करून ना. थंय पत्रकारिता करप धोक्या परस उणे ना.
गाझा झुजांत 200 परस चड पत्रकारांक मरण…
सुमार 18 म्हयने झुजांत झुजपी पॅलेस्टायनाचो क्रमांक 163वे क्रमांकाचेर आसा. इझ्रायल सैन्यान गाझांतले जायते खबरां कक्ष पुरायपणान नश्ट केल्यात अशें अहवालांत म्हणलां. 2023 वर्सा गाझा हांगा झूज सुरू जाले उपरांत 200 परस चड पत्रकारांक मरण आयलां.
दुसरे वटेन चीन, व्हिएतनाम ह्या सारक्या देशांनी प्रसार माध्यमांचेर सरकाराचें वा सरकाराकडेन संबंदीत आशिल्ल्या संघटनांचें नियंत्रण आसता. स्वतंत्र पत्रकारांक सतत धमक्यो येतात. दुसरे वटेन परकी मिडिया संघटना खंयच्याय वेळार ब्लॅक लिस्ट करूं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
