भांगरभूंय | प्रतिनिधी
कर्मचारी भरती आयोगाची जायरात
23 मे मेरेन अर्ज भरपाची मुजत
सविस्तर म्हायती वॅबसायटीर उपलब्ध
भांगरभूंय । प्रतिनिधी
पणजी : गोंय कर्मचारी भरती आयोगान शिक्षक, तांत्रीक सहाय्यका सयत (टीए) वट्ट 398 पदां भरपा खातीर जायरात दिल्या. ह्या पदां खातीर अर्ज करपाची निमाणी तारीख 23 मे 2025 आसा. अर्ज करपा विशींच्यो सुचोवण्यो, शिक्षणीक पात्रता तशेंच हेर म्हायती https://gssc.goa.gov.in हे वेबसायटीचेर उपलब्ध आसा. अंदूंच्या म्हणल्यार 2025 वर्सा खातीरची ही पयली जायरात आसा. पोरूं जारी केल्ले जायरातींतलीं एलडीसी तशेंच ज्युनियर स्टेनोग्राफर पदां भरपा खातीरची प्रक्रिया सुरू आसा.
विवीध शिक्षकां खातीर 134 पदां
सहाय्यक शिक्षकांचीं 118, चित्रकला शिक्षकांचीं 2 आनी इंग्लीश शिक्षकांचीं 14 (सरकारी मुळाव्या शाळांत) मेळून वट्ट 134 पदां भरपाचीं आसात. सहाय्यक शिक्षकां खातीरच्या 118 पदां मदीं इंग्लीश 26, हिंदी 22, कोंकणी 10, मराठी 10, संस्कृत 2, गणीत 14, विज्ञान (फिजिक्स/ कॅमेस्ट्री/ बायोलॉजी) 14 आनी समाज शास्त्र (हिस्ट्री/ जॉग्रोफी/ सिविक्स/ इकोनोमिक्स) 20 पदां भरपाचीं आसात. 118 पदां मदलीं दिव्यांगां खातीर 5, एक्स सर्विसमेना खातीर 2 आनी खेळगडयां खातीर 5 पदां राखीव आसात. हे भायर दरेका विशया खातीर एससी, एसटी, ओबीसी, ईडब्ल्यूएस अशें आरक्षण आसा.
चित्रकला शिक्षकांचीं 2 पदां भरपाचीं आसात. हातूंतलें एक पद दिव्यांगां खातीर राखीव आसा.
सरकारी मुळाव्या शाळां खातीर प्रशिक्षीत इंग्लीश शिक्षकांचीं 14 पदां आसात. 14 पदां मदलीं 8 पदां दिव्यांगां खातीर राखीव आसात.
कला आनी संस्कृती खात्यांत ग्रंथपालाचीं 10 पदां
कला आनी संस्कृती खात्यांत ग्रंथपालाचीं (लायब्ररीयन ग्रेड 1) 10 पदां भरपाचीं आसात. हातूंतलीं 4 पदां ओबीसी जाल्यार 1 पद ईडब्लूएस (अर्थीक नदरेन मागास) खातीर राखीव आसा. 10 पदां मदलीं 2 पदां दिव्यांगां खातीर राखीव आसात.
पीएसआयची सगळ्यांत चड 187 पदां भरतले
पुलीस खात्यांत पुलीस उपनिरिक्षकांची (पीएसआय) 187 पदां भरपाची प्रक्रिया सुरू जातली. 187 पदां मदलीं 30 पदां बायलां खातीर राखीव आसात. दादल्यां खातीर 157 पदां आसात. दादल्यां खातीर जीं 157 पदां आसात, तातूंत एससी 3, एसटी 19, ओबीसी 41, ईडब्लूएस खातीर 14 पदां राखीव आसात. तशेंच 157 पदांतल्यान एक्स सर्विसमेना खातीर 4 जाल्यार खेळगड्यां खातीर 8 पदां राखीव आसात.
बायलां खातीर जीं 30 पदां राखीव आसात, तातूंतलीं 3 पदां खेळगड्यां खातीर राखीव आसात. तशेंच एसटी 3, एससी 1, ओबीसी 9 जाल्यार ईडब्ल्यूएस खातीर 3 पदां राखीव आसात. पीएसआय पदा खातीर पिराय 28 मेरेन आसपाक जाय. सरकारी कर्मचाऱ्यां खातीर नेमा प्रमाण 5 वर्सांची सूट मेळटली.
विवीध खात्यांत तंत्रीक सहाय्यकाचीं 62 पदां
भौशीक बांदकाम, पंचायत, उदका पुरवण, ग्रामीण उदरगत मेळून तंत्रीक सहाय्यकाची (टीए) वट्ट 62 पदां खातीर जायरात जारी जाल्या. हातूंत सिव्हील फांट्यांत 57, मॅकॅनिकल/ इलेक्ट्रीकल फांट्यांत 4, कम्प्युटर/ इलेक्ट्रॉनीक/ आयटी फांट्यांत 1 पद आसा.
सिव्हील फांट्यांत जीं 57 पदां आसात तातूंतलीं एसटी खातीर 5, एससी खातीर 1, ओबीसी खातीर 10 जाल्यार ईडब्लूएस खातीर 4 पदां राखीव आसात. मॅकॅनिकल/ इलेक्ट्रीकल फांट्यांतल्या 4 पदांतलीं 1 ओबीसी खातीर जाल्यार 1 दिव्यांगां खातीर राखीव आसा. कम्प्युटर/ इलेक्ट्रॉनीक/ आयटी फांट्यांतलें 1 पद दिव्यांगा खातीर राखीव आसा.
प्रॉग्रामर, तंत्रीक अधिकारी मेळून 5 पदां
लेखा (अकावंट) संचालनालयांत प्रॉग्रामराचीं 2, मुखेल वेंचणूक अधिकाऱ्याच्या कार्यालयांत तंत्रीक अधिकारी (1 पद) आनी कनिश्ठ तंत्रीक अधिकाऱ्याचीं 2 पदां भरपाचीं आसात. ह्या 5 पदां मदलें एकूय पद राखीव ना.
सर्वसामान्य गटा खातीर 400 रुपया शुल्क
अर्जा सयत शुल्क लेगीत ऑनलायन पद्दतीन भरचें पडटलें. सर्वसामान्य गटा खातीर अर्जाचें शुल्क 400 रुपया आसा. एससी/ एसटी खातीर 100 रुपया, ओबीसी खातीर 200 रुपया, दिव्यागां खातीर 100 रुपया जाल्यार अर्थीक नदरेन मागास (ईडब्लूएस) उमेदवारां खातीर 200 रुपया शुल्क आसा.
परिक्षेची तारीख उपरांत कळयतले
सीबीटी परिक्षेची तारीख थारले उपरांत वॅबसायटी वयल्यान कळयतले. परिक्षेचो अभ्यासक्रम वॅबसायटीचेर उपलब्ध आसा.
पिरायेंत सूट
एससी/ एसटी खातीर पिरायेंत 5 वर्सांची, ओबीसी खातीर 3 वर्सांची जाल्यार दिव्यांगां खातीर पिरायेंत 10 वर्सांची सूट मेळटली. एससी/ एसटी मदल्या दिव्यांगांक 15 वर्सांची जाल्यार ओबीसी मदल्या दिव्यांगांक 13 वर्सां पिरायेंत सूट मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
