भांगरभूंय | प्रतिनिधी
गोंयांतल्या 48 टक्के गिरायकांक मेळटालो लाव
भांगरभूंय । प्रतिनिधी
पणजी : गोंयांतल्या सर्वसामान्य लोकांक आदार दिवचे खातीर 1 सप्टेंबर 2021 ह्या दिसा सरकारान सुरू केल्ली 16 हजार लिटर मेरेन उदक फुकट दिवपाची येवजण 1 मे 2025 सावन स्थगीत केल्या. तशेंच 15 कुडीं परस चड कुडी आशिल्लीं हॉटेलांक, रेस्टॉरंण्टांक पयल्या 80 हजार लिटर उदका खातीर दर लिटर 25 रुपया, जाल्यार 80 लिटरां परस चड उदका खातीर दर लिटराक 30 रुपया दिवचे पडटले. भौशीक बांदकाम खात्यान (पीडब्ल्यूडी) हे संबंदांत अधिसुचोवणी जारी केल्या.
फाटले विधानसभा वेंचणुकेच्या सात म्हयन्यां आदीं 15 ऑगस्ट 2021 ह्या दिसा मुख्यमंत्री डॉ. प्रमोद सावंत हांणी ‘फुकट उदका खातीर उदक वाटयात’ ही मोहीम चालीक लावन दर म्हयन्याक 16 हजार लिटरां मेरेन उदक वापरपी कुटुंबांक शुन्य रुपया बील येतलें, अशें जाहीर केल्लें. ते उपरांत 30 ऑगस्ट 2021 ह्या दिसा पीडब्ल्यूडीन अधिसुचोवणी जारी करून 1 सप्टेंबर 2021 ह्या दिसा सावन ही येवजण सुरू केल्ल्याचें जाहीर केलें. तेन्ना सावन आतां मेरेन गोंयांतल्या सुमार 48 टक्के गिरायकांक हे येवजणेचो लाव मेळटालो. पूण आतां ही येवजण 1 मे 2025 सावन स्थगीत करता अशी सुचोवणी पीडब्ल्यूडीन जारी केल्या.
मजगतीं, फुकट उदक येवजण फक्त विधानसभा वेंचणूक दोळ्यां मुखार दवरून केल्ल्याचो दावो त्या वेळार विरोधकां कडल्यान केल्लो. ताका लागून आतां येवजण बंद केल्ल्यान विरोधक परतून एकदां आक्रमक जावपाची शक्यताय आसा. सरकाराच्या ह्या निर्णयाक लागून सर्वसामान्यांक मात उदका खातीर परतून एकदां पयशे मोडचे पडटले.
दरवाडीचेर विरोधकांनी केल्ली टिका
सरकारान 2022 त फुकट उदक येवजण कायम दवरून 16 हजार लिटरां परस अदीक उदक वापरप्यां खातीर 5 टक्के उदक दरवाड केल्ली. ताचे वयल्यान विरोधकांनी सरकाराचेर टिका करपाक सुरवात केल्ली. फक्त विधानसभा वेंचणूक जिखपा खातीर गोंय सरकार दिल्ली फॉर्मुला वापरता, अशी टिका आम आदमी पक्षान केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
