भांगरभूंय | प्रतिनिधी
अखील गोंय लघू मच्छीमार संघटनेची मागणी
पणजी ः नुस्तेमारी खात्यान तिसवाडी तालुक्यांतल्या एसटी समाजांतल्या 40 नुस्तेमारांक थकीत अनुदान बेगोबेग दिवचे अशी मागणी अखील गोंय लघू माछीमार संघटनाचे पदाधिकारी संजय परेरा हांणी केल्या. शुक्रारा पणजेंत जाल्ले पत्रकार परिशदेंत ते उलयताले. ह्या वेळार शैला डिमेलो, लक्ष्मण मंगेशकार आनी हेर वांगडी हाजीर आशिल्ले. खात्यान कांय नुस्तेमारांचे 2023 आनी 2024 वर्साचे अनुदान अजून दिवंक ना अशें परेरा हांणी सांगलें.
परेरा हांणी सांगलें, खात्याचे येवजणे खाला 2023 वर्सा सुमार एक कोटी रुपया नुस्तेकारांक मंजूर केल्ले. राज्यभरांतल्या वेगवेगळ्या नुस्तेमारांक हे येवजणेचो लाव मेळ्ळो. पूण, तिसवाडी तालुक्यांतल्या 40 नुस्तेमारांक हे येवजणेचो निधी मेळूंक ना. तशेंच 2024 वर्साचोय निधी मेळूंक ना. आमी खात्याच्या अधिकाऱ्यांक हे विशीं विचारलें तेन्ना तांणी म्हणलें, हे संबंदी फायल मुख्यमंत्र्यांच्या कार्यालयांत आसा.
वर्स सोंपलें म्हणून निधी मेळूंक ना अशें लेखा खात्यांतल्या एका अधिकाऱ्यान सांगलें. हाचे आदीं कांय नुस्तेमारांनी थळाव्या आमदारांक मेळून निधी मेळयल्लो. पूण आमच्या हक्काच्या निधी खातीर दर खेपे आमदार आनी मंत्र्यां कडेन वचप आमकां योग्य दिसना. हे संबंदी आमी परतून खात्याच्या संचालकाक स्मरणपत्र धाडलां. राज्यांतल्या हेर नुस्तेमारांक ही मजत मेळटा जाल्यार आमचोच निधी कित्याक दवरलो हाची जाप मेळप गरजेचें आसा अशें परेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
