भांगरभूंय | प्रतिनिधी
नवी दिल्ली, खबरां संस्था: केंद्र सरकारान हालींच जातीचेर आदारून जनगणना करपाचो निर्णय जाहीर केलो. विरोधकां सयत जायत्या पक्षांनी फाटल्या कांय वर्सां सावन जातनिहाय जनगणनेचो मुद्दो लावन धरिल्लो. निमाणें प्रधानमंत्री नरेंद्र मोदी हांचे अध्यक्षते खाला जाल्ली कॅबिनेट बसकेंत हो निर्णय घेतला. जातीय जनगणने वरवीं पसमंदा मुस्लीम समुदायाचो ओबीसी प्रवर्गात आसपाव करपाक शकता, अशी चर्चा आसा. भाजपाच्या एका वरीश्ठ फुडार्यान सांगलें, ‘राष्ट्रीय जनगणने वरवीं पसमंदा मुस्लीमांक तांचो योग्य वांटो दितले’ भाजपाच्या अल्पसंख्यांक मोर्चा आनी ओबीसी मोर्चाच्या फुडार्यांनीय हाका तेंको दिला.
भाजपाच्या ओबीसी मोर्चाचे अध्यक्ष के. लक्ष्मण हांणी सांगलें: मंडल आयोगाचे शिफारशी प्रमाण मुस्लीम समुदायांतल्या कांय गटांक केंद्र आनी राज्य सरकाराच्या मागासवर्गीय वळेरेंत आसपाव केला. ह्या मुस्लीम गटांची गणना जातनिहाय जनगणनेंत करतले.
भाजपाच्या अल्पसंख्यांक मोर्चाचे राष्ट्रीय अध्यक्ष जमाल सिद्दीकी हांणी सांगलें : पसमंदा मुस्लीमूय भारताचेच नागरीक. हाका लागून जातनिहाय जनगणनेंत तांच्या मागाशिल्ल्यापणाचीय नोंद करतले.
मुस्लीम समाजांत फूट घालपाचो डाव
आययूएमएल पक्षाचे खासदार हारिस बीरन हांणी, पसमंदा मुस्लिमांक ओबीसी प्रवर्गांत आसपावन मुस्लीम समाजांत फूट घालपाचो हो यत्न आशिल्ल्याचें दिसता. मुस्लीम समुदाय हो मुळांतूच मागासलेलो गट, अशें निरीक्षण सर्वोच्च न्यायालयान नोंद केल्लें आसतना, तांचे उदरगती खातीर हेर मार्ग पळयनासतना ताची वर्गवारी कित्याक? असोय प्रस्न हारीस बीरन हांणी हजर केलो.
फाटल्या वर्सा लोकसभा वेंचणुकेच्या प्रचारा मजगतीं, प्रधानमंत्री नरेंद्र मोदी हांणी उत्तर प्रदेशाच्या अलीगढ हांगा जाहीर सभेंत भाशण करतना कॉंग्रेस आनी तांचो मित्रपक्ष समाजवादी पक्षाचेर टिका केल्ली. पसमंदा मुस्लीमां कडेन ह्या दोन पक्षांनी आडनदर केली, असो आरोप करीत ह्या समुदायाक संद दिवपाक जाय, अशें प्रधानमंत्री मोदी हांणी म्हणलें. पसमंदा मुस्लीम समाज हो भाजपाक लागीं आसा, अशें राजकी निरीक्षकांचें मत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
