भांगरभूंय | प्रतिनिधी
पेडणें : तुयेंच्या गोमॅकोक जोडिल्ल्या हॉस्पिटला खातीर उबारिल्ले इमारतींत हांगचें सामुदायीक भलायकी केंद्र हालोवपाक हरकत आसा. हे इमारतींत बांबोळी जोडपी हॉस्पिटलूच जावचे खातीर तुयां हॉस्पिटल कृती समितीचे अध्यक्ष जुझे लोबो हांणी भलायकी सचिवांक कायदेशीर नोटीस दिल्या.
ऍड. प्रसाद शहापुरकार हांचे वरवीं दिल्ले हे नोटीशींत लोबो हांणी म्हणलें, राज्य सरकारान २०१२ वर्सा साधन सुविधा विकास महामंडळाकडेन हे इमारतीचें काम दिल्लें. मात आजूनय काम पुराय जावंक ना. मजगतीं, हे इमारतींत तुयेंचें सामुदायीक भलायकी केंद्र हालोवपाचो विचार सरकारान केला. मात हाका नागरिकांचो विरोध आसा. हे इमारतींत गोमॅको कडेन संबंदीत हॉस्पिटल उक्तें करचें ही लोकां मागणी आसा.ना जाल्यार आंदोलन करतले अशी शिटकावणी तुयें हॉस्पिटल कृती समितीन दिल्या.
तुयां हॉस्पिटल उबारपाक तेन्नाचे मुख्यमंत्री प्राचार्य लक्ष्मीकांत पार्सेकार, तेन्नाचे मुख्यमंत्री मनोहर पर्रीकार हांणी बरेच त्रास घेवन ह्या हॉस्पिटलाची इमारत उबारली. हें हॉस्पिटल बांबोळे हॉस्पिटलाक लिंक करपाच्या हेतान मुख्यमंत्री प्राचार्य लक्ष्मीकांत पार्सेकार हांणी आपले कारकिर्दीत तशी येवजण आयिल्ली. मात ताचे उपरांत भलायकी मंत्री, सरकारान ह्या हॉस्पिटला कडेन मुद्दम आडनदर केल्ल्यान हें हॉस्पिटल अजूनय सुरू करिना. ते खातीर नागरीकांनी खर तिडक उक्तायतात. मंत्री, आमदार विवीध माध्यमांतल्यान ह्या हॉस्पिटला विशीं वेगवेगळ्यो प्रतिक्रिया दितना फटत आस्वाासनां दितात. तीं आस्वासनां कित्याक पाळिनात? असो प्रस्न आतां नागरीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
