भांगरभूंय | प्रतिनिधी
मडगांव : मडगांव पुलिसांनी मॉडिफायड आनी नंबर प्लेट नाशिल्ल्यो दोन दुचाकी जप्त केल्यो. तशेंच परवानगे बगर रेंट अ बायकचो वेवसाय करपी फुटपाथाचेर पार्क केल्ल्यो दोन दुचाकींचेर कारवाय केली.
मडगांव शार पुलीस स्टेशनाचे हद्दींत गस्त घालतना पुलीस निरीक्षक सूरज सामंत हांणी जायते येरादारी नेम मोडप्यांचेर कारवाय केली. फूटपाथाचेर बेकायदेशीरपणान पार्क केल्ली आनी वैध फिटनेस प्रमाणपत्रां बगर वेवसाय करपी दोन रेंट अ बायक वाहनां मेळ्ळीं. मोटार वाहन कायद्या प्रमाण हीं वाहनां जप्त केलीं. हाचे भायर, आवाजाचें प्रदुशण करपी आनी मोटार वाहन कायदो मोडपी सुधारीत सायलेन्सर आनी नंबरप्लेट नाशिल्ल्यो दोन मोटारसायकली जप्त केल्यो.
सगल्या नेम मोडप्यां आड मोटार वाहन कायद्याच्या तरतुदीं प्रमाण योग्य कायदेशीर कारवाय सुरू केली. मडगांव शार पुलिसां कडल्यान भौशीक सुरक्षितता सुनिश्चीत करपा खातीर आनी येरादारी शिस्त राखतले अशें सांगलें. फुडाराक अशेच तरेन नेम मोडप्यां आड खर कारवाय करतले, अशेंय मडगांव पुलीस निरीक्षक सामंत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
