भांगरभूंय | प्रतिनिधी
कामगार दिसा निमतान पणजेंत जाहीर सभा
पणजी: देशांतल्या आनी राज्यांतली कुशल कामगारांक उण्यांत उणें म्हयन्याक 35 हजार रुपया पगार दिवचो अशी मागणी अखील भारतीय ट्रेड युनियन काँग्रेस (आयटक) संघटणेचे अध्यक्ष ख्रिस्तोफर फोन्सेका हांणी केली. बिरेस्तारा संवसारीक कामगार दिसा निमतान पणजेंत आयोजीत केल्ले जाहीर सभेंत ते उलयताले.
ह्या वेळार अॅड. सुहास नायक, राजू मंगेशकार, प्रसन्ना उटगी आनी राज्यभरांतले कामगार हाजीर आशिल्ले. ह्या वेळार सरकार कडेन विवीध 24 मागण्यो केल्याे.
फोन्सेका हांणी म्हणलें, केंद्र सरकार कामगार विरोधी आसा. सरकार भांडवलदारांच्या फायद्याचें आनी कामगारांचेर अन्याय करपी कायदे हाडीत आसा. केंद्रान कामगार विरोधी चार काळे कायदे ताकतिकेन फाटीं घेवंक जाय. देशांत बेरोजगारी वाडत आसा. संप केले उपरांत कामगारांक काडून उडयतात वा पयस बदली करतात. संघटणे वतीन आमी ह्या गजालींचो निशेध करतात. कामगारांक आपल्या हक्का खातीर लडपाचो अधिकार आसा.
तांणी मुखार उलयतना म्हणलें, सामान्य लोकां सयत कामगारांक म्हारगाय सोंसची पडटा. अशा वेळार कामगारांचो उण्यांत उणो पगार वाडोवप गरजेचें आसा. अकुशल कामगारांक म्हयन्याक 26 हजार पगार आनी 10 हजार रुपया निवृत्ती वेतन मेळप गरजेचें आसा. तशेंच दीसपट्टे काम करपी कामगारांक उण्यांत उणें एक हजार रुपया दिवप गरजेचें आसा. सरकारान टॅक्सी, बस ड्रायव्हर, नुस्तेमार, पर्यटना कडेन निगडीत हेर थळाव्या वेवसायिकांचें हीत सांबाळूंक जाय.
सातवो वेतन आयोग लागू करचो
सरकारान फार्मासिटीकल कंपनींतल्या कामगारांक संपार वचपा आड काडिल्ल्या एस्माचो आदेश रद्द करचो अशी मागणी ह्या वेळार केली. तशेंच पंचायत, गोवा डेरी, आंगणवाडी आनी पूर्व मुळावे शिक्षक आनी मजतनीस हांकां सातवो वेतन आयोग लागू करचो. एचबीए भत्तो लागू करचो, इंधन दरवाड उणी करप, मनरेगार उण्यांत उणें 200 दीस रोजगार उपलब्ध करून दिवप अश्यो मागण्यो ह्या वेळार केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
