भांगरभूंय | प्रतिनिधी
भांगरभूंय । प्रतिनिधी
पणजी : फार्मास्युटीकल, हॉस्पिटेलीटी वा हेर खंयचेय कंपनींतल्या कामगारांचें शोशण सरकार खपोवन घेवचें ना. विवीध मागण्यां खातीर आंदोलनां करिनासतना कामगारांनी सरकारा कडेन उपाय काडपा खातीर चर्चा करची. कामगारांचें हीत तशेंच सगळ्या येवजण्यांचो लाव दिवपा खातीर सरकार बांदील आसा, अशें आश्वासन मुख्यमंत्री डॉ. प्रमोद सावंत हांणी कामगार दिसाचे कार्यावळींत उलयतना दिलें.
पणजे कामगार आनी रोजगार आयुक्त कार्यालयान आयोजीत केल्ले श्रम गौरव पुरस्कार भेटोवपाचे कार्यावळींत मुख्यमंत्री उलयताले.
बांदकाम कामगार कल्याण निधींत 230 कोटी रुपया आसात. कामगारां खातीरूय कल्याण निधी स्थापन केला. कामगार कल्याण निधीचे येवजणेंत सुदारणा घडोवन चडांत चड लाव कामगारांक मेळोवन दितले. गोंयकार उण्या पगाराक लागून खाजगी कंपनी वा आस्थापनांत काम करपाक इत्सूक नासतात. पूण ईएसआय, प्रॉव्हीडंट फंड अशो जायत्यो येवजण्यो कामगारां खातीर आसात. ईएसआय खाला उपचारा खातीर कामगारांक 20 लाख रूपयां मेरेन मजत मेळपाक शकता. दिवचले ईएसआय हॉस्पिटलाचें काम सुरू आसा. सांग्यांरूय नवें ईएसआय हॉस्पिटल जातलें. दिनदयाळ स्वास्थ्य सेवा येवजणेच्या (डीडीएसएसवाय) कार्डार मुंबय उपचार करपाचे आसल्यार पयलीं हॉस्पिटलांत पयशे भरचे पडटात. कार्डा खाला सरळ लाव मेळना. हे स्थितींत ईएसआय कार्ड कामगारां खातीर सामकें उपेगी थारता. आयुशमान कार्ड, आभा कार्ड, वन नेशन वन रेशन अशा येवजण्यांचोय लाव सगल्या कामगारांक मेळटा. बांदकाम कामगारांनी 3 म्हयने जरी काम केलां तरी तांकां कल्याण निधी खाला हावसींग एडवान्स येवजणेचो लाव मेळपाक शकता. तशेंच अपघात जाल्यार ई श्रम कार्ड येवजणे खाला अर्थीक मजत दिवपाचीय तरतूद आसा. हाका लागून सगल्या कामगारांनी ई श्रम कार्ड करपाची गरज आसा, अशें मुख्यमंत्र्यांनी सांगलें.
आयडीसींतल्या कंपनींनी काम करपी कामगारां खातीर बस सेवा सुरू करपाचो प्रस्ताव आसा. वेर्णा उद्देगीक वसणुकेंत बायलां कामगारां खातीर हॉस्टेल सुरू करपाची येवजण आसा. गोंयकार जड कामां करिनात, प्लंम्बीग, इलेक्ट्रीशियनाचीं कामां ते करतात. हाका लागून इलेक्ट्रीकल वा प्लंम्बीग कंत्राटदार जावप गोंयकारां खातीर सहज शक्य आसा, अशें डॉ. सावंत हांणी म्हणलें.
खाजगी कंपनींच्या वेव्हाराचेर देखरेख
खाजगी कंपनींनी कामगारांक योग्य पगार दिवप गरजेचें. अप्रेंटीशीप पुराय जाले उपरांत त्याच पगाराचेर कामगारांक दवरपाक मेळचें ना. तांकां कायम करप वा प्रोबेशनाचेर दवरप बंधनकारक आसा. खाजगी कंपन्यांच्या एकंदर वेव्हाराचेर सरकाराची देखरेख उरतली, अशें डॉ. प्रमाद सावंत हांणी स्पश्ट केलें.
जातनिहाय जनगणना, इतिहासीक निर्णय
पणजी : जातनिहाय जनगणना करपाचो केंद्रीय मंत्रिमंडळाचो निर्णय हो इतिहासीक स्वरुपाचो आसा. ह्या निर्णयाचो समाजीक आनी अर्थीक सुदारणा चालीक लावपा खातीर व्हडा प्रमाणांत प्रमाणांत लाव जातलो, अशें मुख्यमंत्री डॉ. प्रमोद सावंत हांणी म्हणलें. जातनिहाय जनगणना करपाचो निर्णय हाचे आदीं खंयच्याच सरकारान घेवंक ना, अशें सांगतनाच मुख्यमंत्र्यांनी ह्या निर्णयाक येवकार दिलो. केंद्रीय मंत्रिमंडळान बुधवारा जातनिहाय जनगणनेक मान्यताय दिली. गोंयांत भंडारी समाजाच्या फुडार्यांनी जातनिहाय जनगणना करपाची मागणी मुख्यमंत्र्यां कडेन केल्ली. जनगणना हो विशय केंद्रांचे अखत्यारींत आयिल्ल्यान हाचेर केंद्र सरकार निर्णय घेतलें, अशें आश्वासन मुख्यमंत्र्यांनी भंडारी समाजांतल्या फुडार्यांक दिल्लें. जातनिहाय जनगणना करपाचो निर्णय केंद्रान घेतिल्ल्यान भंडारी समाजाची मागणी मान्य जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
