भांगरभूंय | प्रतिनिधी
पणजी : पहलगाम हल्ल्याक लागून गोंया सावन पर्यटना खातीर काश्मीरांतलें बुकींग रद्द जालां. 15 मे उपरांत बुकींग परतून सुरू जातलें. सुरक्षेचो उपाय म्हूण गंयांतल्या ट्रॅव्हल एजन्सींनी काश्मीराचें बुकींग बंद केलां, अशी म्हायती टीटीएजीचे आदले अध्यक्ष आनी ट्रव्हल एजन्सीचे धनी निलेश शाह हांणी दिली.
पहलगाम सयत हेर कांय वाठारांत वचपाक पर्यटकांचेर सध्या बंदी आसा. तरी लेगीत जम्मू, काश्मीर वाठारांतलें पर्यटन सुरू जालां. गोंय सोडून हेर वाठारांतले पर्यटक वचपाक सुरवात जाल्या. मात पर्यटकांचें प्रमाण उणें आसा. गोंयांतल्यान काश्मीर वचपाचें बुकींग मात सध्या बंद आसा, अशें निलेश शाह हांणी सांगलें. गोंयांतल्यान शिमला, उटी जशे पर्यटक वतात तितल्याच प्रमाणांत काश्मीरांत वतात. फाटलीं कांय वर्सां काश्मीरांत शांतिकायेचें वातावरण आशिल्ल्यान काश्मीराची सोबितकाय पळोवपी गोंयकारांचें प्रमाण वाडटालें. पहलगाम हल्ल्या उपरांत स्थितींत बदल जाला. काश्मीरांतली स्थिती आनी केंद्राचे अॅडवायजरीचो विचार करून 15 मे उपरांत काश्मीराचे बुकींग सुरू जातलें, अशें निलेश शाह हांणी सांगलें. आदले वरी प्रतिसाद मेळचो ना. तरी लेगीत ल्हवू ल्हवू प्रतिसाद वाडपाक लागतलो, अशी आस्त तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
