भांगरभूंय | प्रतिनिधी
बेकायदेशीर मेगा प्रकल्पांक विरोध चालूच उरतलोः मनोज परब
पणजी ः बांबोळेच्या वर्ल्ड वायड रिसॉर्ट आनी ग्रँड हयात काँक्रीटाचे राखणे वणतीचे काम बंद करपाचो आदेश नगर नियोजन खात्यान दिल्ल्यान रिव्होल्युशनरी गोवन्स पक्षान (आरजीपी) आंदोलन फाटीं घेतलां. पक्षाचे अध्यक्ष मनोज परब हांणी बिरेस्तारा ही घोशणा केली. ह्या वेळार आमदार विरेश बोरकार, अजय खोलकार आनी हेर आंदोलनकर्ते हाजीर आशिल्ले. गोंयांतल्या बेकायदेशीर बांदकामां आड आरजीचो विरोध चालूच उरतलो अशें परब हांणी स्पश्ट केलें.
परब हांणी सांगलें, नगर नियोजन खातें गोंयच्यो जमनी, दोंगर, न्हंयो, शेतां दिल्लीकारांच्या ताब्यांत दवरतात. हे खातीर व्हड बांदकाम प्रकल्पांक बेकायदेशीर परवाने दितात. बांबोळेच्या दोन बांदकाम प्रकल्पांकय अशेच परवाने दिल्ले. हाचे आड आमी फाटले चार दीस पाटो हांगाच्या खात्याच्या कार्यालया मुखार बेमुदत आंदोलन सुरू केल्ले. सुरवेक आमचीं फकांडां जालीं. पूण ह्या आंदोलनाक वाडत आशिल्लो तेंको मतींत घेवन खात्यान काम बंद करपाचे आदेश जारी केले. आंदोलन येसस्वी जालें तरी आमचो लढो चालूच उरतलो. नगर नियोजन खातें, तांचे अधिकारी आनी तांच्या निर्णयांचेर आमी नदर दवरतले अशें तांणी सांगलें.
सरकाराक सामान्यांची काळजी ना- आरजीपी
लोकांचे प्रस्न मुखार दवरतले. गोंय वाचवपाचें आसल्यार आमी एकठांय येवन फुडाकार घेवपाची गरज आसा. तुमच्या पक्षान केन्नाच तडजोडीचें राजकारण केल्लें ना आनी हाचे फुडेंय केन्नाच करचें ना. आमकां मतां मेळूं वा ना मेळूं आमी लढत रावतले. ह्या आंदोलनांत राज्यांतल्या विरोधी पक्षां कडल्यान आमकां तेंको मेळटलो अशी अपेक्षा आशिल्ली. पूण काँग्रेस, गोवा फॉरवर्ड वा आप कोणूच मुखार आयले नात. ह्या लोकांक सामान्य गोंयकारांचें बरें करपाचें ना, तर स्वता खातीर बरें करपाचें आसा. तांच्या वागणुकेंतल्यान हो पक्ष भाजपाचो बी पंगड अशें स्पश्ट जालां. गोंय वांचोवपा खातीर गोंयकारांक आरजीपी जाय काय दिल्लींतलो पक्ष जाय हाचो विचार गोंयकारांनी करचो अशें परब हांणी सांगलें.
जमीन सुरक्षा समिती
गोंयच्यो जमनी वांटावपा खातीर पक्ष बेगीनूच दरेका मतदारसंघांत जमीन सुरक्षा समिती स्थापन करतलो. हे खातीर हेल्पलायन क्रमांक सुरू करतले. लोकांनी आपल्या वाठारांत सुरु आशिल्ल्या बेकायदेशीर बांदकामांची म्हायती पक्षाक दिवची अशें परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
