भांगरभूंय | प्रतिनिधी
बांधकामां सयत कामगारांचे मजत निधीत जातल्यो व्हड सुधारणा
पणजी : फार्मास्युटीकल, हॉस्पिटेलीटी वा हेर खंयच्याय कंपनींतल्या कामगारांचे शोशण सरकार खपोवन घेवचें ना. विवीध मागण्यां खातीर आंदोलना करिनासतना कामगारांनी सरकारा कडेन तोडग्या खातीर चर्चा करची. कामगारांचें हीत तशेंच सगळ्या येवजण्यांचो लाव दिवपा खातीर सरकार बांदील आसा, अशें आश्वासन मुख्यमंत्री डॉ. प्रमोद सावंत हांणी कामगार दिसाचे कार्यावळींत उलयतना दिलें.
पणजे कामगार आनी रोजगार आयुक्त कार्यालयान आयोजीत केल्ल्ल्या श्रम गौरव पुरस्कार भेटोवपाचे कार्यावळींत मुख्यमंत्री उलयताले.
बांधकाम कामगार कल्याण निधींत २३० कोटी रुपया आसात. कामगारां खातीरूय कल्याण निधी स्थापन केला. कामगार कल्याण निधीचे येवजणेंत सुधारणा घडोवन चडांत चड लाव कामगारांक मेळोवन दितले. गोंयकार उण्या वेतनाक लागून खासगी कंपनी वा आस्थापनांत काम करपाक इत्सूक नासतात. तरी इएसआय, प्रॉव्हीडंट फंड अशो जायत्यो येवजण्यो कामगारां खातीर आसात. ईएसआय खाला उपचारां खातीर कामगारांक २० लाख रूपयां मेरेन मजत मेळपाक शकता. दिवचले ईएसआय हॉस्पिटलाचें काम सुरू आसा. सांग्यांरूय नवें इएसआय हॉस्पिटल जातलें. दिनदयाळ स्वास्थ्य सेवा येवजणेच्या (डीडीएसएसवाय) कार्डार मुंबय उपचार करपाचे आसल्यार पयलीं हॉस्पिटलांत पयशे भरचे पडटात. कार्डा खाला सरळ लाव मेळना. हे स्थितींत इएसआय कार्ड कामगारां खातीर सामकें उपेगी थारता. आयुशमान कार्ड, आभा कार्ड, वन नेशन वन रेशन अशा येवजण्यांचोय लाव सगल्या कामगारांक मेळटा. बांदकाम कामगारांनी ३ म्हयने जरी काम केलां तरी तांकां कल्याण निधी खाला हाउजिंग एडवान्स येवजणेचो लाव मेळपाक शकता. तशेंच अपघात जाल्यार ई श्रम कार्ड येवजणे खाला अर्थीक मजत दिवपाचीय तरतूद आसा. हाका लागून सगल्या कामगारांनी ई श्रम कार्ड करपाची गरज आसा.
आयडीसींतल्या कंपनींनी काम करपी कामगारां खातीर बस सेवा सुरू करपाचो प्रस्ताव आसा. वेर्णा उद्देगीक वसणुकेक बायलां कामगारां खातीर हॉस्टेल सुरू करपाची येवजण आसा. गोंयकार जड कामां करीनात, प्लंम्बिग, इलेक्ट्रीशीयनाचीं कामां ते करतात. हाका लागून इलेक्ट्रीकल वा प्लंम्बिग कंत्राटदार जावप गोंयकारां खातीर सहज शक्य आसा, अशें डॉ. सावंत हांणी म्हणलें.
खासगी कंपनींच्या वेव्हाराचेर देखरेख
खासगी कंपनींनी कामगारांक योग्य पगार दिवप गरजेचें. अप्रेंटीशिप पुराय जाले उपरांत त्याच पगाराचेर कामगारांक दवरपाक मेळचे ना. तांकां कायम करप वा प्रोबेशनाचेर दवरप बंधनकारक आसा. खाजगी कंपन्यांच्या एकंदर वेव्हाराचेर सरकाराची देखरेख उरतली, अशें डॉ. सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
