भांगरभूंय | प्रतिनिधी
नवी दिल्ली, खबरां संस्था: मे म्हयनो जायते बदल घेवन येता. आयच्यान अमूलचें दूद २ रुपयांनी म्हारग जालें. तुमी एटीएम फ्री लिमिटा उपरांत पयशे काडल्यार तुमकां चड शुल्क भरचें पडटलें. तशेंच आतां तुमी वेटींग तिकेटीचेर स्लीपर आनी एसी कोचांत प्रवास करपाक शकनात. आयच्यान, १९ किलोचो वेवसायीक सिलिंडर १७ रुपयांनी सवाय जाला.
मे म्हयन्यांत जावपी ५ बदल…
१. अमूलाचें दूद २ रुपया म्हारग
मदर डेअरी आनी वेर्का ब्रँडा उपरांत, अमूलानूय देशभरांत दुदाच्या दरांत प्रती लिटर २ रुपया वाडयल्यात. नवें दर आयच्यान म्हणल्यार १ मे सावन लागू जालां. अमूल स्टँडर्ड, अमूल बफेलो मिल्क, अमूल गोल्ड, अमूल स्लिम अँड ट्रिम, अमूल चाय माझा, अमूल ताजा आनी अमूल गायीच्या दुदाच्या दरांत २ रुपयांची वाड जाल्या.
२. एटीएमांतल्यान पयशे काडप म्हारग
रिझर्व्ह बँकेन आयच्यान एटीएमांतल्यान पयशे काडपाच्या दरांत सुधारणा केल्या. फुकट म्हयन्याळी मर्यादा सोंपले उपरांत, गिरायकांक आतां एटीएमांत दरेका वेव्हारा खातीर २३ रुपया दिवचे पडटले. आदीं दरेका वेव्हारा खातीर २१ रुपया शुल्क आकारताले. हें शुल्क २०२२ वर्सा लागू केलें.
फुकट मर्यादे उपरांत दरेक पयशे काडपा खातीर २३ रुपया शुल्क आकारतले.
तुमच्या बँकेच्या एटीएमाचेर दर म्हयन्याक ५ फुकट एटीएम वेव्हार
महानगरांत हेर बँकांच्या एटीएमाचेर ३ फुकट वेव्हार
महानगरा भायल्या शारांत हेर बँकांच्या एटीएमाचेर ५ फुकट वेव्हार
फुकट वेव्हार मर्यादेंत कसलोच बदल ना.
भारतांतल्या सगल्या बँकांच्या बचत खातेधारकांक लागू
३. वेटिंग तिकेटीचेर स्लीपर-एसी कोचींत प्रवास करपाक शकचे ना
भारतीय रेल्वेच्या नव्या नियमा प्रमाण, प्रतीक्षा वळेरेंतली तिकिटे आशिल्ल्या प्रवाशांक आतां स्लीपर वा एसी कोचींतल्यान प्रवास करपाची परवानगी उरची ना.
ज्या प्रवाशांच्यो तिकेटी वेटींग लिस्टार आसात. तांकां आतां फकत सामान्य डब्यांतल्यान प्रवास करपाक मेळटल्यो. जर खंयचोय प्रवासी वेटींग तिकिटीचेर एसी वा स्लीपर कोचींत प्रवास करतना दिसल्यार ताका दंड दितले. प्रवासांतलो विसव आनी कोचांतली गर्दी उणी करप होच हाचे फाटलो हेत आसा.
नेम मोडल्यार ख्यास्त:
एसी खातीर दंड: रु. ४४०
न्हिदपी मनशाक दंड: रु. २५०
हाचे भायर, तुमकां ट्रेनीच्या सुरुवातीच्या स्टेशना पसून तुमकां जंय धरतले त्या स्टेशना मेरेनचें भाडें दिवचें पडटलें.
१ मे २०२५ सावन लागून जावपी आनीक एक नेम म्हणल्यार आयआरसीटीसी वेबसायट वा ऍपावेल्यान बुक केल्ल्या दरेके ट्रेन तिकेटी खातीर ओटीपी-आधारीत मोबायल पडताळणी गरजेची आसतली. सुरक्षा वाडोवप आनी बुकिंग प्रणालीचो गैरवापर आडावप हो ह्या उपायाचो हेत.
४. वेवसायीक सिलिंडर १७ रुपयांनी सवाय
आयच्यान, १९ किलाचो वेवसायीक सिलिंडर १७ रुपयांनी सवाय जाला. दिल्लीक ताचें दर १४.५० रुपयांनी उणें जावन १७४७ रुपयांचेर आयलां. आदीं तें १७६२ रुपयांक उपलब्ध आशिल्लें.
५. २६ प्रादेशीक ग्रामीण बँकांचें विलीनीकरण
२६ प्रादेशईक ग्रामीण बँकांच्या विलीनीकरणाचो चवथो टप्पो आयच्यान लागू जाला. सरकारान म्हणलां, १० राज्यां आनी १ केंद्रशासीत प्रदेशांतल्या २६ प्रादेशीक ग्रामीण बँकांचें विलीनीकरण करपाचो मुखेल हेतू बँकिंग वा सुधारपा वांगडाच ऑपरेटिंग खर्च उणो करप आसा.
मध्य प्रदेश ग्रामीण बँक आनी मध्यांचल ग्रामीण बँक हांचे विलीनीकरण करून मध्य प्रदेश ग्रामीण बँक स्थापन केल्या. ताचें मुख्यालय इंदूर आसा आनी बँक ऑफ इंडिया वरवीं प्रायोजीत आसा.
महाराष्ट्र ग्रामीण बँक आनी विदर्भ कोकण ग्रामीण बँकेचे विलीनीकरण करून महाराष्ट्र ग्रामीण बँकेची स्थापना केल्या. ताचें मुख्यालय संभाजीनगरांत आसा आनी बँक ऑफ महाराष्ट्रा वरवीं प्रायोजीत आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
