भांगरभूंय | प्रतिनिधी
आरजीपीचे कार्यकर्ते वचून मेळ्ळे पंचायत संचालकांक
पणजीः बांबोळे वर्ल्ड वायड रिसोर्ट हांणी पर्यावरण दाखलो घेनासतना बांदकाम चालू केल्लें. देखून हो प्रकल्प बेकायदेशीर हें सिद्ध जाता. पंचायत संचालनालयान हाची दखल घेवची आनी ह्या प्रकल्पाक दिल्ले सगळे परवाने रद्द करपाचे निर्देश कुडका- बांबोळे पंचायतीक दिवचे, अशी मागणी रेव्ह्युलेशनरी गोवन्स पक्षान (आरजीपी) दिल्या.
वर्ल्ड वायड रिसोर्टाचो मेगा प्रकल्प बंद करचो अशी मागणी करपा खातीर थळावे आमदार विरेश बोरकार हांणी आरजीपीच्या हेर फुडार्यां सयत टीसीप कार्यालया भायर धरणें धरलां. हे फाटभूंयेर आरजीपीच्या कार्यकर्त्यांनी संबंदीत खात्यांनी भेट दिवन ह्या प्रकल्पांक दिल्ले परवाने रद्द करपाची मागणी करपाक सुरवात केल्या. ह्या प्रकल्पां विशीं बुधवारा आरजीपीच्या कार्यकर्त्यांनी पंचायत संचालनालयांत भेट दिली.
भेटी उपरांत उलयतना पक्षाचे भांडारी अजय खोलकार हांणी सांगलें, आमदार बोरकार हांच्या आंदोलनाचो तिसरो दीस चालू आसा आनी ताचो परिणाम दिसून येवचो हे खातीर आमी पंचायत संचालकाची भेट घेतली.
सगळ्यांत पयलीं आमी कुडका पंचायतीक भेट दिवन सरपंच आनी सचिवांक मेळ्ळे. मात आमकां फावो तशी जाप मेळूंक नाशिल्ल्यान पंचायत संचालकाक येवन मेळ्ळे आनी पर्यावरण प्रभाव मुल्यांकन प्राधिकरणान हें बांदकाम बंद उडोवपाचो आदेश दिवन पर्यावरण कायद्या खाला निर्देशांक पाळो दिवपाक सांगलां. हे पंचायत संचालकाक दाखोवन दिलें. ह्या आदेशाच्या आदाराचेर कुडका पंचायतीक कारवाय करपाक सांगची अशें आमी मागलां, अशे खोलकार हांणी सांगलें.
पंचायतीक विचारल्याक दरेक फावट पंचायत सांगता ह्या प्रकल्पाक सगल्या परवानग्यां वयल्यान आयल्यात देखून पंचायत कांयच करपाक शकना. देखून आमी आयज पंचायत संचालकांची भेट घेतली आनी तिका सांगलें ह्या प्रकल्पांक पर्यावरण दाखलो ना. ताका लागून हो प्रकल्प बेकायदेशीर प्रकल्प म्हण सिद्ध जाला. पंचायत राज कलम ६६ खाला पंचायतीन दिल्ल्यो सगल्यो परवानग्यो रद्द करच्यो, अशी मागणी खोलकार हांणी केल्या.
जर ह्यो परवानग्यो रद्द करिना जाल्यार आमी हे विशीं याचिका दाखल करतले. आमी तिका सांगलां आमकां पंचायत संचालनालयाचेर मोर्चा हाडपाचो ना. उपरांत पंचायत संचालकान हे विशींचे सगळे दस्तावेज आमकां धाडपाक सांगलें आनी कुडका पंचायतीक हे विशींचे निर्देश काडपाचें आश्वासन दिलें, अशे खोलकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
