भांगरभूंय | प्रतिनिधी
भांगरभूंय । लुईस रॉड्रिग्स
बेळगाव : कर्नाटक, महाराष्ट्र आनी हेर कांदो पिकोवपी वाठारांतल्यान वाडत वचपी पुरवणेक लागून बेळगांवच्या होलसेल बाजारांत कांद्याचे दर उणे जायत आसात. कांद्याचो दर्जो आनी आकारा प्रमाण किलाक रु. 5 ते रु. 18 रुपया मेरेन ठोक (होलसेल) दर उणो जाला. हांगाच्या शेतकी उत्पादन बाजार समितीच्या (एपीएमसी) बाजारांतल्या ठोक विक्रेत्यांच्या म्हणण्या प्रमाण, दर सप्तकांत कांदो व्हरपी व्हडल्या ट्रकांचे लोड बेळगाव एपीएमसी बाजारांत पावतात, जाका लागून कांद्याची भरपूर पुरवण चालू आसा. साहजिकूच गोंयचीय कांदो पुरवण वाडल्या आनी ताका लागून कांद्याचे दर नियंत्रणांत आसात. गोंयांत, सध्या चडशे कडेन कांदो 24 ते 34 रुपया कील मोलांत विकतात.
वेपाऱ्यांच्या मतान, ठोक दरांत कांदो खरेदी करपाचो हो योग्य वेळ. कारण दर थीर आसतात आनी कांद्याचो दर्जो उत्कृश्ट आसता. “नासिक, लासलगांव, सोलापूर आनी उत्तर कर्नाटक वाठारांतल्यान पुरवण वाडिल्ल्यान म्हयन्या परस चड काळ कांद्याचे दर थीर आसात. देखून हांगाच्या एपीएमसीच्या ठोक कांदो आनी बटाट्याच्या बाजारांत बऱ्या दज्याचो कांदो पावपाक लागला, जाका लागून आतां पावसाच्या हंगामा खातीर ‘पुरुमेंता’ खातीर कांदो विकत घेवंक मेळटा.
“दर सप्तकांत सुमार 200 मल्टी एक्सल ट्रकभर कांदो एपीएमसीच्या ठोक बाजारांत पावता. ताका लागून दर देंवल्यात. वाडट्या तापमानाक लागून शेतकारय आपलो सांठो निवळ करपाचो यत्न करतात. कारण चड तापमानाक लागून कांदो कुसता. हो प्रवाह आनीक एक म्हयनो चालू उरतलो, अशें ज्योती ट्रेडर्सचे धनी आनी मुखेल ठोक विक्रेते संभाजीराव पाटील होनगेकर हांणी सांगलें.
दरा विशीं विचारलें तेन्ना तांणी सांगलें, आकारा प्रमाण दर किलाक 5 ते 18 रुपया मेरेन बदलल्यात. देखीक सगळ्यांत ल्हान आकार जो ‘गोली’ ह्या नांवान वळखतात, तो दर किलाक 5 ते 8 रुपया मदीं मेळटा जाल्यार सगळ्यांत व्हडलो आनी सगळ्यांत बरो दर्जो 15 ते 18 रुपया किला मेरेन मेळटा. ह्या वर्सा कांदो सगळ्यांत उण्या दरांत मेळपाो होच वेळ आसा.”
पावसाच्या पुरुमेंता खातीर वो फ़ुडल्या वर्सा खातीर कांदो घेवपाक जायतीं कुटुंबां ठोक बाजारांत पावतात, अशें आनीक एक ठोक विक्रेतो संदीप मुंगारी हांणी सांगलें. “हो कांदो खरेदी करपाक योग्य वेळ आनी आमचे कडेन भितरल्या वाठारांतल्यान व्हड प्रमाणांत पुरवण आसा. देखून लोकांक थेट पावसा खातीर आनी घडये वर्सा खातीर एपीएमसी ठोक बाजारांत भेट दिवंक मेळटा.”
ठोक आनी व्हड प्रमाणांत किरकोळ विक्रेते बेळ्गाव एपीएमसी ठोक कांद्याच्या बाजारांत भेट दितात. कारण कांदो हो रांदचे कुडींतलो मुखेल पदार्थ आतां सवाय जाला. किचन बजेट लेगीत नियंत्रणांत आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
