भांगरभूंय | प्रतिनिधी
मडगांव : आर्ले- नुवेंच्या बायपासाचेर एक तरणाटो दुचाकी घेवन वतना गाडयेवेलें नियंत्रण सुटलें आनी तो रस्त्या कुशीक पडलो. ही घडणूक थंयच्यान वचपी मुख्यमंत्री डॉ. प्रमोद सावंत हांच्या सामकार घडली. तांकां दिसलें दुचाकेक गाडयेन धपको दिला आसतलो म्हूण. तांणी गाडी थारोवन त्या दुचाकी चलोवप्याची विचारपूस केली.
डॉ. सावंत हे रस्त्यार कोणायचोय अपघात जाल्लो दिसल्यार, रावून मजत करपाक धांवतात, हें परत एक फावट बुधवारा दिसून आयलें. मुख्यमंत्री आर्लेच्यान नवे वटेन बायपासा वेल्यान येताले. तेन्नाच दुचाकीवेल्यान येवपी एक तरणाटो रस्त्या कुशीक वचून पडलो. मुख्यमंत्र्यान आपल्या गाडयांचो ताफो थारोवपाच्यो सुचवण्यो केल्यो. ते गाडयेंतल्यान देंवले आनी त्या तरणाट्याची विचारपूस केली. गाडयांचे गर्देक लागून दुचाकी कुशीक घेवपाक वतना टायर रस्त्या सयकल गेल्ल्यान ती निसरून पडली, अशें ताणें सांगलें.
डॉ. प्रमोद सावंत हांणी सांगलें, ह्या तरणाट्याचे कुशीकच्यान एक गाडी वेगान गेल्ली. आपल्याक दिसले ते गाडयेन दुचाकीक धपको दिला आसतलो. तो पडला तें पळोवन ताका मजत करपाक हांव देंवलों.
वतलो मरे तूं. काय पावोवपाक लावं, अशें विचारलें तेन्ना त्या तरणाट्यान आपल्याक कांय जावंक ना अशें सांगलें. उपरांत मुख्यमंत्र्यान ताका सवकास गाडी चलोवपाक सांगलें आनी ते गेले.
मजगतीं, ह्यान पयलींय मुख्यमंत्र्यान काणकोणच्यान येतना बार्श्यां जाल्ल्या अपघातात जखमींक मजत केल्ली. उपरांत घोगळच्या दुचाकी आनी गाडये मदल्या अपघातांतल्या जखमींकूय आपल्या ताफ्यांतले गाडयेंतल्यान हॉस्पिटलांत धाडिल्ले. मुख्यमंत्र्यांचे अपघात जाल्ल्या दुचाकी चालकाक मजत करपाचे कृतीची उपस्थितांनी तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
