भांगरभूंय | प्रतिनिधी
फलपट्टी, खबरां संस्था: मंगळारा रातीं कोलकत्त्यांतले फलपट्टी नुस्तेंमारी वाठारांतल्या एका हॉटेलांत लागिल्ल्या उज्यांत चवदा जाणांक मरण आयलें. सध्या हो उजो नियंत्रणांत हाडला. २२ जाणांक वाटायल्यात. आजून आनीक लोक हांगा आडकल्ल्याची शक्यताय आसा. तांकां वाटावपाचें काम चालू आसा.
पुलीस आयुक्त मनोज वर्मा हांणी सांगलें, रातच्या ८:१५ वरांचेर ऋतुराज हॉटेलांत उजो लागलो. हे विशीं म्हायती मेळटांच उजो पालोवपी दळ आनी पुलिसांच्या पंगडान घडणुके सुवातेर पावन वाटोवपाचें आनी मजत करपाचें काम केलें. आतां मेरेन १४ कुडी भायर काडल्यात. अपघाताचे चवकशे खातीर एक विशेश पंगड तयार केला.
हॉटेलाचे चवथे माळयेर बसयिल्ल्या वीज मिटरांत शॉर्ट सर्कीट जाल्ल्यान उजो लागिल्ल्याचें मुळाव्या तपासांत मुखार आयलें. घडणुके सुवातेर हजर आशिल्ल्या एका मनशान सांगलें, जायते लोक आपलो जीव वाटावपा खातीर हॉटेलाच्या पांख्या वेल्यान आनी जनेलांतल्यान उडयो मारतना दिसले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
