भांगरभूंय | प्रतिनिधी
गोंयच्या वेवसायिकाचो यूकेच्या नागरिकाचेर आरोप
पणजी: कोपी देसा प्रायव्हेट लिमिटेड कंपनीच्या संचालकपदा वेल्यान आपल्याक बेकायदो काडलो आनी आपलो फायदो हातासलो असो आरोप वेवसायीक तशेंच ह्या कंपनीचे संचालक शाहीश शंभू नायक गांवकार हांणी केलो. यूकेचे नागरीक जेम्स अँड्रयू साय हाऊडेन हांचेर नायक गांवकार हांणी फटवणूक, बनावटगिरी आनी अर्थीक गैरवेव्हाराचो आरोप करून काणकोण पुलीस आनी कंपनी रजिस्ट्रार (आरओसी) हांचे कडेन कागाळ दाखल केल्या.
नायक गांवकार हांचे कागाळी प्रमाण फाटल्या पांच वर्सां सावन ते ह्या कंपनीचे भागिदार आनी संचालक आसात. तांचे कडेन कंपनीची 10 टक्के भागिदारी आसा. सप्टेंबर 2024 वर्सा आपल्याक कळयनासतना हाऊडेन हांणी 26 सप्टेंबर दिसाच्या राजिनामो पत्राचेर आपली फटीची सय केली आनी 4 ऑक्टोबर दिसा संचालक मंडळांतल्यान काडून उडोवपा खातीर कंपनीचो थाराव मंजूर केलो. अशा खंयच्याच राजिनाम्याचेर आपणे सय केल्ली ना असो दवो नायक गांवकार हांणी केला.
दीसपट्ट्या कामकाजाचें वेवस्थापन करपा खातीर मोबदलो दिवपाचें आस्वासन आपल्याक दिल्लें. पूण पयशे दिलेनात. तशेंच कंपनीचे अर्थीक वेव्हार आनी हेर नोंदी संबंदी विस्वासांत घेनाशिल्ले. ताका लागून अर्थीक गैरवेवस्थापन आनी योग्य प्रक्रिये बगर वेवसायांतल्यान वगळायिल्ल्याची आपल्याक सुलूस लेगीत लागली ना अशें कंपनी रजिस्ट्राराक बरयिल्ल्या पत्रांत नायक गांवकार हांणी म्हणलां.
डिसेंबर 2024 वर्सा नवी कंपनीची नोंदणी करपाचे प्रक्रिया वेळार नायक गांवकार हांकां एका सल्लागारा कडल्यान कळ्ळें की ते आतां कोपी देसा प्रायव्हेट लिमिटेडाच्या संचालकपदार नात. नोंदी वेल्यान दिसून आयलें की तांकां 26 सप्टेंबर 20224 दिसा काडून उडयल्यात आनी तांचे सुवातेर दुसऱ्या मनशाची नेमणूक केल्या. पूण हे विशीं तांकां कसलीच सुचोवणी, संमती वा अधिकृत पत्र धाडून दिवंक नाशिल्ल्याचो दावो नायक गांवकार हांणी केला.
दोनूय कागाळीं मदीं शाहीश नायक गांवकार हांणी हाऊडेना आड फौजदारी कारवाय करपा सयत बनावट कागदपत्रां आनी अनधिकृत बोर्ड थारावां सयत बेकायदो कृतींची चवकशी करपाची विनंती केल्या. आपल्याक संचालकपदार परतून नेमचो, तशेंच कंपनीतलो आपलो वांटो दिवपाची विनंती तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
