भांगरभूंय | प्रतिनिधी
नवी दिल्ली, खबरां संस्था: उत्तर प्रदेश-बिहारांत सोमारा वीज पडून चार जाणांक मरण आयलें. उत्तर प्रदेशांतल्या अयोध्ये एक चलयेक, तर फतेहपूरांत शेतकाराक मरण आयलें. बिहारांतल्या पाटणा आनी हाजीपूरांत एकेकल्याक मरण आयलें.
आयज देशांतल्या २१ राज्यांनी गडगडाटा सयत पावस पडपाची शिटकावणी हवामान खात्यान दिल्या. राजस्थान, पंजाब, हरियाणा, चंडीगढ आनी दिल्लींत उश्णतायेचें ल्हार येवपाचें आसा. राजस्थानांत सेगीत दुसर्या दिसा तापमान वाडटलें.
आयतारा बाडमेरांत सगल्यांत चड ४६.१ अंश सेल्सिअस तापमान नोंद जालें. दिल्लीक आयतारा तापमान मात्शें देंवलें. तें ४१.३ अंश सेल्सिअस आसलें. मजगतीं, पंजाबांत हवामान खात्यान फुडल्या पांच दिसां खातीर उश्णतायेच्या ल्हाराचो येलो अलर्ट जारी केला.
प्रधानमंत्री मोदी हांणी मारलो उलो
प्रधानमंत्री नरेंद्र मोदी हांणी आयतारा तांच्या ’मन की बात’ रेडिओ कार्यावळींत लोकांक राष्ट्रीय आपत्ती वेवस्थापन प्राधिकरणाच्या (एनडीएमए) मोबायल फोन ऍप्लिकेशन ’सचेत’ वापरपाचो उलो मारलो. तांणी सांगलें, हाका लागून तांकां सैमीक आपत्तींत आडकपा पसून मजत जातली. हें अॅप रिअल-टाइम जिओ-टॅग्ड आपत्तीची शिटकावणी दिता.
प्रधानमंत्र्यानी म्हणलें, हुंवार, चक्रीवादळ, भूस्खलन, त्सुनामी, रानांत उजो, बर्फ पडप, वादळ, वीज कोसळप, अश्या जायत्या आपत्तीं विशीं ‘सचेत अॅप’ तुमकां दरेके तरेन म्हायती दिवपाची आनी सुरक्षीत दवरपाचो यत्न करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
