सातवेंतल्या पुस्तकांतले मुघल आनी दिल्ली सल्तनत विशय काडले
भांगरभूंय | प्रतिनिधी
एनसीईआरटीचो निर्णय, मेक इन इंडिया, महाकुंभाचो आसपाव
नवी दिल्ली, खबरां संस्था ः एनसीईआरटीन यत्ता सातवेच्या पुस्तकांचो अभ्यासक्रम बदलला. इतिहास आनी भूगोलाच्या पाठ्यपुस्तकांतल्यान मुघल सल्तनत आनी दिल्ली सल्तनताचे विशय काडून उडयल्यात. जाल्यार मेक इन इंडिया आनी बेटी बचाओ बेटी पढाओ ह्या सारक्या सरकारी उपक्रमांचो जांतूत महाकुंभाचो आस्पाव ह्या पुस्तकांत केला.
एनसीईआरटी म्हणलें, हीं पुस्तकां 2 भागांनी प्रकाशित जातलीं आनी हो पुस्तकांचो फकत पयलो भाग. दुसऱ्याया भागांत हे विशय जोडटले काय ना हें स्पश्ट जावंक ना. हे बदल शाळेच्या शिक्षणा खातीर राष्ट्रीय अभ्यासक्रम आराखडो म्हणल्यार एनसीएफएसई 2023 वरवीं केल्यात. हे बदल राष्ट्रीय शिक्षण धोरण 2020 खाला तयार केल्यात.
हाचे आदीं एनसीईआरटीन कोविड-19 म्हामारीच्या काळांत मुघल आनी दिल्ली सल्तनत कडेन संबंदीत जायते विभाग उणे केल्ले. तातूंत तुघलक, खिलजी, लोधी आनी मुघल हांच्या कामगिरीचेर विशयांचो आस्पाव आशिल्लो. आतां हे विशय पुस्तकांतल्यान पुरायपणान काडून उडयल्यात.
खरें म्हणल्यार एनसीईआरटीन इतिहास, भूगोल आनी समाजीक आनी राजकीय जिणेचीं 3 वेगवेगळीं पुस्तकां 1 त विलीन केल्यात. ताचें नांव एक्सप्लोरिंग सोसायटी- इंडिया अँड बियॉन्ड भाग 1 अशें आसा. ताचो भाग 2 बेगीनूच प्रकाशित जातलो. हीं पुस्तकां 2025-26 सत्रां सावन लागू जातली.
नांवां बदल्लीं
हालींच एनसीईआरटीन वेगवेगळ्या वर्गां खातीर पुस्तकांचीं नवीं नांवां जाहीर केल्यांत. यत्ता पयली आनी दुसरीच्या इंग्लीश पुस्तकांचें नांव MARIGOLD वयल्यान ‘MRIDANG’ आनी यत्ता तिसरीच्या पुस्तकाचें नांव ‘संतूर’ अशें बदललां.
यत्ता सवेच्या इंग्लीश पुस्तकाचें नांव ‘HONEYSUCKLE’ वयल्यान ‘POORVI’ अशें बदललां. गणिताच्या पुस्तकां खातीरूय हीच पद्दत आपणायल्या. आदीं इंग्लीशींत ‘मॅथेमॅटिक्स’ आनी हिंदींत ‘गणीत’ अशें नांव आशिल्लें. आतां तें दोनूय भाशांनी ‘गणित’ म्हूण मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
