भांगरभूंय | प्रतिनिधी
कांय खेळां प्रकारां कडेन आडनदर जाल्ली दिसता. चडशे लोक क्रिकेट, फुटबाॅल आनी बॅडमिंटन खेळटात. जे खेळ लोकप्रीय आसात आनी जातूंत पयसो आसा, जांच्या दर म्हयन्याक सर्ती जातात, अशेय खेळ तरणाटे खेळटात. असोच एक खेळ देशी, पूण दुर्लक्षीत. ताका लोकप्रीयताय मेळूंक ना. तो खेळ म्हणल्यार मल्लखांब. हालींच हांव तळावलेच्या मातृछायेच्या बालआश्रमांत करियर मार्गदर्शन करपाक गेल्लों. थंय ज्येश्ठ जाळवणदार सागर साकोर्डेंकार मेळ्ळे. ते 2014 सावन मातृछायेच्या तळावलेच्या बालआश्रमाचे अध्यक्ष म्हूण काम पळयतात. जैन समाजाचे आदले अध्यक्ष अशोकजी मुगदम हांणी ह्या आश्रमांतल्या भुरग्यांची तोंड भरून तोखणाय केली. हांगाचे मल्लखांबाचे खेळगडे राष्ट्रीय पांवड्याचेर सर्तींनी खेळ्ळ्यात. इनामां मेळयल्यांत. भोवमानादीक प्रधानमंत्री नरेंद्र मोदीजी हांचे मुखार तांणी आपली कला सादर केल्या.
वेगवेगळ्या शाळांतले हे भुरगे आसले तरी ते एकवटान ह्या खेळाक योगदान दितात. तळावली, दुर्भाट, कवळें, वाठारांतल्या शाळांनी ते शिकतात. हांगा देशी खेळाक प्राधान्य दितात, ही गजाल कोणाकूय आवडली. अभिमानान सांगपा सारकी गजाल म्हणल्यार जैन समुदायान ह्या वावराक सगलो तेंको दिला. ते कार्यावळीक पसून तांणीच फुडाराक घेतलो. अशोक दादा मुगदम हे तर उमेदीन भरिल्लें व्यक्तीमत्व. तांच्या आश्रमांतल्या भुरग्यां खातीर बऱ्योच कल्पना आसात. तांची कल चाचणी म्हणल्यार एप्टिट्यूड टेस्ट घेवपाक ते सोदतात.
मल्लखांब ह्या खेळाचो इतिहास नेमको खबर ना. मात हनुमानान ताचो सोद लायलो अशें म्हणटात. तो कुस्ती सारकोच एक प्रकार. जातूंत सगल्या आंगाक व्यायाम जाता. पेशवे सत्तेर आसतना महाराष्ट्रांत मल्लखांब चड पातळिल्लो. हो खेळ शिकोवपाक आखाडे आसतात. गोंयांत ते नात. काणकोण, फोंडेंच्या कायं शाळांनी मल्लखांब शिकयतात. तळावलेच्या बालआश्रमांत रावपी विद्यार्थ्यांक अमित कानविंदे हे मल्लखांब शिकयतात. तांची मुद्दाम तोखणाय करूंक जाय. मोबायल फोनाचें आकर्शण, फुटबाॅल, क्रिकेट हांचे पसून विद्यार्थ्यांक पयस दवरून ते विद्यार्थ्यांक मल्लखांब शिकयतात. इनामां मेळयतात, इतलेंच न्हय, तर भोवमानेस्त प्रधानमंत्री मोदीजी हांचे मुखार प्रात्यक्षिक करपाची तांकां संद मेळटा, हें अजाप न्हय, तर चमत्कार म्हणपाक जाय.
महालक्ष्मी, शारदा, सरस्वती ह्या शाळांतले भुरगे मल्लखांब शिकपाक वतात, अशें सागर साकोर्डेंकार हांणी सांगलें. आश्रमांत गरीब, अनाथ, घरांतले परिस्थितीक वाजेल्ले भुरगे आसात. तांचेर कसलोच मानसीक परिणाम जावचो ना, हाची आमी जतनाय घेतात, तांचे खातीर तरेकवार कार्यावळी दवरतात, अशेंय तांणी सांगलें.
मल्लखांबाचे राष्ट्रीय संघटने कडेन तळावलेचे भुरगे संलग्न आसात. ताका लागून गोंयांत तो तग धरून आसा. ह्या दुर्लक्षित खेळा प्रकाराक आमी उर्बा दिवंक जाय. ताका लागून एका देशी खेळा प्रकाराक तग धरपाक मजत जातली. हो खेळ तिगोवन दवरिल्ले खातीर बालआश्रमांतल्या भुरग्यांक, जाळवणदारांक, जैन समुदाय समितीक परबीं. समितीचे वांगडी चडशे हिंदी प्रदेशांतले. हांगा विद्यार्थ्यांक खेळाचें मार्गदर्शन हिंदींतल्यान जाता. ती आमच्या देशाची राष्ट्रभाशा. हिंदी वांगडाच कोंकणींत तशेंच त्या विद्यार्थ्यांक कळटा ते भाशेंत जाता. हे विद्यार्थी बुद्धीबळ, कबड्डी, खो- खो सारके देशी खेळटात. ते केन्नाच आपले भितर झगडनात, हें विशेश. श्री. साकोर्डेंकार सांगतात, ह्या भुरग्यां मदीं जायते सुप्त गूण आसात. तेच सोदून काडपाचें जैन समितीक आव्हान आसा. हे खातीर आमी यत्न करतात. जें आमकां मेळूंक ना, तें तांकां मेळोवन दिवपाचो आमी सगले यत्न करतात. स्वता सागर साकोर्डेकार हे वैदीक गणितांतले तज्ञ. ते भुरग्यांक गणित शिकयतात. इतले बरे तरेन की विद्यार्थ्यांक गणित आवडूंक लागलां. ह्या आश्रमाक मुद्दाम भेट दियात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
