भांगरभूंय | प्रतिनिधी
पणजी : पर्वरेच्या कदंब डेपो लागसारा राष्ट्रोळी महारुद्र देवळा कडेन आयज सकाळीं सुमार ११.३० वरांचेर भिरांकूळ अपघात जालो. हातूंत एकल्याक मरण आयलें. मरण आयिल्ल्या तरणाट्याचें नांव उमेश मुट्टागी (सुकुर, ३५) अशें आसा.
हे विशींचे म्हायती प्रमाण, कदंब डेपो कडल्यान देवळाचे दिकेन वेगान येवपी टॅम्पोन आपले लेनींतल्यान दुसरे लेनींत प्रवेश केलो. ह्या वेळार चालकाचें वाहनावेलें नियंत्रण गेलें आनी तांणी देवळा भायर बांकार बशिल्ल्या उमेशाक धपको दिलो. ह्या धपक्यान उमेशाक जाग्यारूच मरण आयलें. ह्या धपक्यान टॅम्पो उमथो पडलो. तशेंच टॅम्पोन धपको दिल्लयन दोन दुचाकींचेंय बरेंच लुकसाण जालें.
हे विशींची म्हायती पुलिसांक दिले उपरांत ते रोखडेच घडणुके सुवातेर पावले. तांणी पंचनामो करून मरण आयिल्ल्याची कूड पोस्टमार्टमा खातीर धाडल्या. हे घडणुकेचो फुडलो तपास पर्वरी पुलीस निरीक्षक राहुल परब हांच्या मार्गदर्शना खाला सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
