मलेरिया मुक्त उत्तर गोंया खातीर भलायकी खात्याची तयारी सुरू

भांगरभूंय | प्रतिनिधी

दक्षीण गोंयचो प्रस्ताव प्रलंबीत

भांगरभूंय । प्रतिनिधी

पणजी : भलायकी खात्या वतीन उत्तर गोंय जिल्ह्याक मलेरिया मुक्त करपाचे नदरेन यत्न सुरू केल्यात. खात्या वतीन हे खातीर गरजेचे आशिल्ले म्हायतीचें एस्तावेजीकरणकर करप सुरू जालां. हे खातीर खात्यान दक्षीण गोंयाक मलेरिया मुक्त जिल्ह्याचो दर्जो दिवपा संबंदांत प्रस्ताव धाडिल्लो. मात हे संबंदांत केंद्रान अजून निमाणो निर्णय दिवंक नाशिल्ल्यान गोंयचो प्रस्ताव केंद्रा कडेन प्रलंबीत आसा. अशें आसलें तरीय गोंय राज्य मलेरिया मुक्तीचे वाटेर आसा, अशी म्हायती भलायकी खात्यांतल्या वरिश्ठ अधिकाऱ्यांनी दिली.

मेळिल्ले म्हायती प्रमाण एक वा तीन वर्सां थळाव्या पांवड्यार म्हणल्यार ‘इंडीजिनियस मलेरिया’चे दुयेंती मेळप ना आनी मलेरियाक लागून मरण येवप ना ह्या दोन निकशांचेर मलेरिया मुक्तीची घोशणा करतात. गोंयांत 2018 सावन मलेरियाक लागून एकल्याकूय मरण येवंक ना. 2021 त इंडीजिनियस मलेरियाचे 90 दुयेंती आशिल्ले. भलायकी खात्यान केल्ले बरे कामगिरीक लागून 2022 त फक्त दोन दुयेंती सांपडिल्ले. जाल्यार 2023 त एकूय दुयेंती सांपडूंक नाशिल्लो. ते प्रमाण खात्यान एक वर्स आनी मरण नासप ह्या निकशांचेर मलेरिया मुक्ती खातीर प्रस्ताव धाडिल्लो.

खात्यान दिल्ले म्हायतीची पडताळणी करचे खातीर डब्ल्यूएचओ, केंद्र आनी हेर राज्यांच्या भलायकी अधिकाऱ्यांनी गोंयाक भेट दिवन पळोवणी केल्ली. पंगडान मडगांव, वास्को आनी कुठ्ठाळी ह्या हॉटस्पॉट केंद्रांची पळोवणी केल्ली. भलायकी खात्याच्या यत्नांक लागून थंयची मलेरिया स्थिती नियंत्रणांत आयिल्ल्याचें केंद्रीय पंगडान मान्य केल्लें. ते उपरांत पंगडान भलायकी खात्या कडल्यान 2023 आनी 2024 ची मलेरियाची आंकडेवारी लेगीत मागिल्ली. वट्ट तीन वर्सांचे आंकडेवारी पळोवन केंद्रीय पंगड बेगिनूच निर्णय घेतलो, अशी म्हायती भलायकी अधिकाऱ्यांनी दिली.

थळाव्यांक लागण जावपाचें प्रमाण सामकें उणें

गोंयांत थळाव्यांक मलेरियाचें जावपाचें प्रमाण खुबूच उणें आसा. ताका लागून गोंयाक मलेरिया मुक्त करप कठीण ना. भोवतेक वेळार स्थलांतरीत कामगार वस्तींत मलेरियाचें प्रमाण चड आशिल्ल्याचें दिसलां. अशें आसलें तरीय सध्या गोंयांत मलेरियाचो प्रस्न गंभीर नाशिल्ल्याचें अधिकाऱ्यांनी स्पश्ट केलें.