भांगरभूंय | प्रतिनिधी
शिवोलेः उज्याक लागून व्हड प्रमाणांत लुकसाण जाल्ल्या घराची दुरुस्ती करपाक पंचायत मंडळान फुडाकार घेतलां. मार्ना- शिवोले पंचायत मंडळान केल्ल्या ह्या वावराची सगळे कडेन तोखणाय जाता.
कांय दिसां आदीं दांडो- शिवोलेंतल्या अनिता शिरोडकार हांच्या घरांत उजो लागलो. हातूंत घराचें व्हड प्रमाणांत लुकसाण जालें. पंचायत मंडळान ह्या प्रकरणाची दखल घेतली. सरपंच संदेश हडफडकार, थळावे पंच वांगडी अभय शिरोडकार, अमित मोरजकार, आदले उप सरपंच विघ्नेश चोडणकार आनी आदले पंच वांगडी महेश्वर गोवेकार हांच्या फुडाकारान पुराय घराची दुरुस्ती जाली. ते खातीर पांच ते स लाख रुपया खर्च जाले. हो सगळो खर्च वयर उल्लेख केल्ल्यांनी केलो.
हे विशीं उलयतना सरपंच हडफडकार हांणी म्हणलें, कठीण काळांत पंचायत वाठारांतल्या लोकांक मजत करप ही पंचायत मंडळाची जापसालदारकी आसता. ते प्रमाण पंचायत मंडळांनी मजत केली. गांवांतले जायते प्रस्न सोडोवपाचो आमी यत्न करतात. ते प्रमाण पंचायत मंडळ एकठांय येवन वावुरतात. फुडाराकूय पंचायत मंडळ सगळ्यांक मजत करपाचो यत्न करतले अशें सरपंच हडफडकार हांणी स्पश्ट केलें.
सरकारा कडल्यान धा हजार रुपया
उज्यांत व्हड प्रमाणांत लुकसाण जाल्ल्या अनिता शिरोडकार हांकां सरकारा कडल्यान 10 हजार रुपयांची अर्थीक मजत मेळ्ळी. हे मजतीचो धनादेश सरपंच संदेश हडफडकार हांच्या हाजिरेंत शिरोडकार हांकां भेटयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
