भांगरभूंय | प्रतिनिधी
नवी दिल्ली, खबरां संस्था ः अमेरिकेंत विकपी सगळे आयफोन फुडल्या वर्सा सावन भारतांत तयार करपाची ॲपलाची येवजण आसा. चीनाचेर निंबून रावप उणें करपाक आनी आपली पुरवण थंयच्यान भायर काडपाक ॲपल आदीं सावन यत्न करतात.
अमेरिकेचे अध्यक्ष डोनाल्ड ट्रम्प हाणें हालींच संवसारभरांतल्या देशांचेर कर लादपाचो निर्णय घेतिल्ल्यान आनी चीना कडेन चालू आशिल्ल्या कर झुजा उपरांत कंपनीन हो निर्णय घेतला. फायनान्शियल टायम्सान ही म्हायती दिली.
2026 मेरेन देशांत 60 कोटी वयर आयफोन जातले तयार
ह्या वर्साच्या निमाणे मेरेन ॲपलान आपली असेंब्ली भारतांत हाडली जाल्यार 2026 मेरेन 6 कोटी परस चड आयफोन तयार जातले. सद्याचे क्षमताये परस हे दुप्पट आसा.
आयफोन उत्पादनांत चीन अजूनय शेक गाजयता
अमेरिका ॲपलाची सगळ्यांत म्हत्वाची बाजारपेठ. ताच्या उत्पादन मुळाव्या साधनसुविधांचेर सद्या चीनाचे वर्चस्व आसा. आयडीसीच्या मतान 2024 त कंपनीच्या संवसारीक आयफोन शिपमेंटांत सुमार 28% ताचो वांटो आसा असो अदमास आसा.
मार्च-24 ते मार्च-25 ह्या काळांत 60 टक्क्यांनी वाड
मार्च 2024 ते मार्च 2025 ह्या 12 म्हयन्यांत ॲपलान भारतांत 22 अब्ज डॉलर्स (सुमार 1.88 लाख कोटी रुपया) मोलाचे आयफोन तयार केले. हातूंत फाटल्या वर्साच्या तुळेंत 60 टक्क्यांनी वाड जाल्या.
ह्या काळांत ॲपलान भारतांतल्यान 17.4 अब्ज डॉलर्स (सुमार 1.49 लाख कोटी) मोलाचे आयफोन निर्यात केल्ले. तेच बरोबर संवसारांतल्या दर 5 आयफोनांतलो एक आयफोन आतां भारतांत तयार जावपाक लागला. भारतांत तमिळनाडू आनी कर्नाटकांतल्या कारखान्यांत आयफोन तयार करतात.
तातूंतलें चडशें उत्पादन फॉक्सकॉन कंपनी करता. तशेंच फॉक्सकॉन हो ॲपलाचो सगळ्यांत व्हडलो उत्पादन भागीदार आसा. हाचे भायर टाटा इलॅक्ट्रॉनिक्स आनी पेगाट्रॉन हेय ह्या वाडट्या उत्पादनांत योगदान दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
