भांगरभूंय | प्रतिनिधी
म्हजें मत
देशांत वाडटे म्हारगायेक लागून सामान्य लोकांचें जिणें कठीण जालां. ‘अच्छे दिन’ येतले हे अपेक्षेन आशिलल्या लोकांक म्हारगायेक लागून जगचें कशें असो प्रस्न पडला. गॅस सिलिंडराचें मोल हालींच पन्नास रुपया वाडलें. ते विशींची खबर हालींच वाचली. 817 रुपयांक मेळपी रांदपाचो गॅस आतां 867 रुपयांक मेळपाक लागला. तशेंच पॅत्राॅल, डिझेलाचे दरुय सतत चडतूच आसतात. म्हयन्याक 25, 30 हजार जोडपी गोंयकाराक पसून ही म्हारगाय परवडना.
इंधन दर वाडटकच विरोधक आक्रमक भुमिका घेवन रस्त्याचेर देंवतात. पूण सध्या विरोधक तितलेंशें प्रभावी आंदोलन करतना दिसनात. पयलीं भाजप फुडारी स्मृती इराणी गॅस सिलिंडराचें मोल वाडलें काय रस्त्याचेर देवन कितलें सुंदर आंदोलन करताली? हो अणभव भाजप तेन्ना विरोध पक्ष म्हणून घेतालो, तो सगल्या भारतीयांनीय घेतला. मात तेच भाजप फुडारी आयज जेन्ना सत्तेर आयले तेन्ना तांकां गॅस सिलिंडरा खातीर केल्ल्या आंदोलनाचो विसर पडलो. तांच्या वावुरप्यांकूय तें याद जायना. म्हणटकच, आंदोलना वांगडाच सामान्य लोकांक जावपी त्रासाचोय तांकां विसर पडलो, अशें म्हणचें पडटलें.
खऱ्यांनीच सामान्य भौसाची हे म्हारगायेच्या चपक्यांतल्यान सुटको जातली तरी केन्ना? अचकीत अशी वाड करून डबल इंजीन सरकारान सामान्याचो अपेक्षाभंग केला.
– गजानन बा. नायक भाटकार,
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
