भांगरभूंय | प्रतिनिधी
वेवसायीक रोहन हरमलकार हाच्या घरांचेर धाड
भांगरभूंय । प्रतिनिधी
पणजी : सक्तवसुली संचालनालयान (ईडी) गोंयांत आतां मेरेनची सगल्यांत व्हड धाड घातली. ईडीन जमीन हडप प्रकरणांत वेवसायीक रोहन हरमलकार हाच्या पिळर्ण, पर्वरी, दिवाडी आनी हेर वाठारांत धाड घालून 1 हजार कोटीं परस अदीक बाजार मोल आशिल्लीं हणजूणें, हडफडें, आसगांव आनी हेर वाठारांतल्या जमनींचीं तशेंच 600 कोटीं परस चड मोलाच्या स्थावर मालमत्तांचीं कागदपत्रां जप्त केलीं. तशेंच पिळर्णाचें हरमलकार हाच्या घराक कुलप मारलां.
ईडीन दिल्ले म्हायती प्रमाण जमीन हडप केल्ल्या प्रकरणांत विशेश तपास पंगडान (एसआयटी) हणजूण्यां सर्वे नं. 444/8 तले 2450 चौखण मिटर जमनी संबंदांत गुन्यांव दाखल केला. ह्या प्रकरणांत कॅनडा रावपी जोयस इझाबेल पिंटो हाचे वतीन मुखत्यारपत्रधारक आंतोनियो डिकॉस्टा हांणी एसआयटी कडेन कागाळ केल्ली. ते प्रमाण जोयस इझाबेल पिंटो हांची हणजूण्यां सर्वे नं. 444/8 तले 2450 चौखण मिटर पुर्वजांची जमीन आसा. ती जमीन दुबावीत वेवसायीक रोहन हरमलकार (गोलती – तिसवाडी), मॅथ्यू डिसोझा (मुंबय), देवानंद कवळेंकार (पिळर्ण), पिटर वाझ (हणजूणें), फेलिक्स नोरोन्हा (शापोरा), धुळेर – म्हापशेंचे आलकांत्रो डिसोझा, जून डिसोझा, आर्चिबल्ड डिसोझा, थेरेझा डिसोझा, मॅक्सी डिसोझा, टीना डिसोझा, वॅरोनिका डिसोझा हांणी कारस्थान रचीन बनावट दस्तावेज तयार करून धुळेर म्हापशेंच्या डिसोझा हांच्या नांवार करून घेतली. ते उपरांत संबंदीत जमीन रोहन हरमलकार हांणी डिसोझा कुटुंबियां कडेन पयली करार केलो. ते उपरांत 28 जानेवारी 2019 ह्या दिसा संबंदीत जमीन हरयणाच्या आकाश चौधरी आनी सीमा चौधरी हांकां विकली, अशें कागाळेंत म्हणिल्लें. हाची दखल घेवन एसआयटीन गुन्यांव दाखल केलो.
ह्या प्रकरणांत एसआयटीन देवानंद कवळेंकार हाका अटक केल्ली. ते उपरांत ताका जामिनाचेर सोडिल्लो. अशेच पद्दतीन जमीन हडप केल्ल्या प्रकरणांत बार्देसाचे निबंधक अर्जून शेट्ये हांणी हणजूणेंची सर्वे नं. 426/5 तली जमीन हडप केल्ल्या प्रकरणांत म्हापशें पुलीस स्टेशनाचेर कागाळ दाखल केल्ली. गुन्यांव दाखल केले उपरांत हें प्रकरण एसआयटी कडेन वर्ग केल्लें. ह्या दोनूय गुन्यांवांची दखल घेवन ईडीन चवकशी केली. हे मजगतीं, वेवसायीक रोहन हरमलकार हाणें व्हड प्रमाणार जमीन वेव्हार केल्ल्याची म्हायती ईडीक मेळ्ळी. ते प्रमाण ईडीचे अतिरिक्त संचालक अवनीश तिवारी आनी उपसंचालक डॉ. भागिरथ चौधरी हांच्या मार्गदर्शना खाला ईडीन 24 आनी 25 एप्रीलाक रोहन हरमलकार हाच्या पिळर्ण, पर्वरी, दिवाडी आनी हेर वाठारांतल्या घरांचेर तशेंच कार्यालयाचेर धाड घातली. ह्या वेळार ईडीन रोहन हरमलकार हाचे कडल्यान 1 हजार कोटीं परस अदीक बाजार मोल आशिल्ले हणजूणें, हडफडें, आसगांव आनी हेर वाठारांतले जमनींची तशेंच 600 कोटीं परस चड मोलाच्या स्थावर मालमत्तेचीं कागदपत्रां जप्त केलीं. तशेंच ईडीन पिळर्णाच्या हरमलकार हाच्या घराक कुलप मारलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
