भांगरभूंय | प्रतिनिधी
नोडल अधिकारी डॉ. महादेव गांवस हांणी दिली म्हायती
पर्वरे : उच्च शिक्षण संचालनालयाच्या खाला येवपी शासकीय आनी अनुदानीत महाविद्यालयांची पयलें वर्स ऑनलायन प्रवेश प्रक्रिया ११ एप्रील सावन सुरू जाल्या. आतां मेरेन समर्थ पोर्टलार णव हजार अर्ज मेळ्ळ्यात, अशी म्हायती उच्च शिक्षण संचालनालयाचे नोडल अधिकारी डॉ. महादेव गांवस हांणी दिली. ३० परस चड पद्वीपूर्व कार्यावळींचो आसपाव आशिल्ले हे प्रवेश प्रक्रियेंत राज्यांतल्या सुमार ४० महाविद्यालयांनी वांटो घेतला. अर्ज करपाची निमाणी तारीख ३० एप्रिलाक आसा. विद्यार्थ्यांनी चड म्हायती खातीर आनी तांचे अर्ज वेळार सादर करपाक उच्च शिक्षण संचालनालय गोंयच्या संकेतस्थळाक आनी समर्थ पोर्टलाक भेट दिवपाचो उलोय डॉ. गांवस हांणी मारलो.
जीयू क्लॅट परीक्षा ११ मेक
बीए.एलएलबी खातीर प्रवेश घेवपाक इत्सूक आशिल्ल्या विद्यार्थ्यांनी जीयू क्लॅट परीक्षेक बसप अनिवार्य आसा. ही परीक्षा ११ मेक जातली. हे खातीरचें प्रवेश शुल्क गोवा विद्यापीठाच्या अधिकृत वेबसायक वा उच्च शिक्षण संचालनालय वेबसायटी वरवीं भरप गरजेचें, अशी म्हायती डॉ. महादेव गांवस हांणी दिली. ज्या अर्जदारांचे निमाणे निकाल आजूनय जाहीर जावंक ना, तेय अर्ज करपाक पात्र आसात, अशें डॉ. गांवस हांणी म्हणलें.
६ मेक अर्ज करपाची निमाणी तारीख
बीए.बीएड प्रवेश प्रक्रिया ता. २५ एप्रील सावन सुरू जाल्या. ही प्रवेश प्रक्रिया ६ मे मेरेन समर्थ पोर्टलार चलतली. हे खातीर उमेदवारान गोवा विद्यापीठान घेतिल्ल्या जीयु-आर्ट २०२५ हे परिक्षेंत मेळिल्ले गूण ऑनलायन अर्जांत नमूद करप गरजेचें. हे गुण नमूद करिना जाल्यार अर्ज प्रवेशा खातीर विचार करचे ना, अशी म्हायती डॉ. गांवस हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
