गोंयकारांनो नुस्तें खावचें बंद करात

भांगरभूंय | प्रतिनिधी

‘पेटा इंडीया’न घालो उलो

पणजीः गोंयकारांक नुस्तें नासले बगर जेवणाची एक उंडीय ताळ्या सकयल देंवना. मात पीपल फॉर एथिकल ट्रीटमेंट फोर एनिमल्स (पेटा) हांणी आपल्या ताटांतल्यान नुस्तें पयस दवरपाची मागणी करून शिवराक जेवपाचो उलो गोंयकारांक मारला. जर गोंयकार खरे नुस्तें मोगी आसात जाल्यार तांणी नुस्तें खावचें न्हय. मनशाक करता तसो मोग तांचेर करचो, असो सल्लो पेटा इंडीया हांणी गोंयकारांक दिला.
नुस्तें मारून तें खावपाचें बंद करचें हो संदेश दिवपा खातीर पेटान पणजे आगळें वेगळें निर्दशन केलें. नुस्त्याच्यो दोन आकृती दवरून ताचे मदीं एक बायलेक जलपरीचे कपडे घालून ती मेल्ले अवस्थेंत दाखोवन नुस्त्यांक जावपी त्रास पटोवन दिवपाचो यत्न केलो.
ह्या वेळार उलयतना पेटा इंडीयाचे समन्वयक उत्कर्ष गर्ग हांणी सांगलें, जर गोंयकार नुस्तें मोगी म्हणटात जाल्यार तांणी तो मोग दाखोवन दिवचो. आमी मनशाचो मोग करता अशें सांगून मनशांक खायनात. तेच प्रमाण जर आमी नुस्तें खाता आसत जाल्यार आमी स्वताक नुस्तें मोगी म्हणपाक शकनांत. जर मनीस वा सुणें, माजर रस्त्यार मेल्लें दिसल्यार, तांचो छळ जाल्लो नदरेक आयल्यार आमचें काळीज दुखता. नुस्तें हे मनशा वरींच आसता. जर मनीस, सुणीं, माजरां खावप चुकीचें जाल्यार नुस्तें कित्याक न्हय? असो प्रस्न गर्ग हांणी केलो.
हांव गोंय तशेंच पुराय संवसाराक सांगपाक सोदतां मनशा भशेन नुस्तें स्वास घेता. तांकांय फामील आसा. फकत जेवणा खातीर तांकां मारप हें सारकें न्हय. संवसारांत अब्जां परस चड नुस्तें खावपा खातीर मारतात. गोंयकारांनी शिवराक जावचें आनी नुस्त्या भशेन रुच दिवपी शिवराकांत दुसरे पर्याय आसात, असो उलो गर्ग हांणी मारलो.
ज्या दर्यातल्या जिवांचो अन्ना खातीर वापर जायनात ते जीव जशे दर्यादेगेवेलीं सवणीं, कांसव, देवमासो हांची कत्तल चल्ल्या आनी हे जीव राष्ट्रीय तशेंच अंतरराष्ट्रीय कायद्या खाला संरक्षीत आसात. डेटा प्रमाण नुस्तें खाल्ल्यार वेगवेगळ्या दुयेसांक आमकां तोंड दिवचें पडटा. नुस्त्या भितर व्हडा प्रमाणांत काॅलेस्ट्रोल आसता तशेंच दर्या प्रदुशीत जाल्ल्यान नुस्त्या भितर मायक्रो प्लास्टीक, आर्सेनीक आनी मरक्युरी रसायनाचें प्रमाण वाडलां. हाका लागून मनशाक भयानक दुयेसां जावपाक शकतात. तुमची, सैमाची आनी निश्पाप जिवांची काळजी घेवपा खातीर नुस्तें खावप बंद करात, असो उलो गर्ग हांणी मारलो.