दवर्ले रेल्वे उड्डाण पुला खातीर भूंय संपादनाची गरज

भांगरभूंय | प्रतिनिधी

सदानंद तानावडेः सुवातेची केली पळोवणी

मडगांव: दवर्ले रेल्वे दरवट्या कुशीक उड्डाण पुलाचे उबारणेचो विशय राज्यसभेंत मांडला. पूण आतां प्रत्यक्ष येवन सुवातेची पळोवणी केली तेन्ना रेल्वे उड्डाण पूल बांदपा खातीर भूंय संपादन करपाची गरज आसा. मुख्यमंत्री डॉ. प्रमोद सावंत हांचे कडेन चर्चा करून गरजेची ती मजत घेतले आनी हो प्रकल्प चालीक लायतले अशें राज्यसभेचे खासदार सदानंद शेट तानावडे हांणी सांगलें.

दवर्ली- दिकारपाल पंचायती कुशीक रेल्वेचो दरवटो आसा. थंय दिसांतल्यान सुमार 82 फावटी रेल्वेचो दरवटो पडटा आनी ताका लागून येवपी वचपी लोकां सयत वाहन चालकांक अडचणींचें थारता. थळाव्यां सयत केपें, सांगें, रावणफोंड वाठारांत वचपा खातीर हो उण्या अंतराचो मार्ग आसा. तानावडे हांणी हो विशय राज्यसभेंत मांडून उड्डाण पुलाची मागणी केल्ली.

उपरांत आतां प्रत्यक्ष दरवट्या कडेन येवन पळोवणी केली. ह्या वेळार आमदार उल्हास तुयेंकार, सरपंच साईश राजाध्यक्ष, पंच हर्क्युलानो निस्साओ, कोंकण रेल्वेचे वरिश्ठ अभियंते सुबोध कुमार आनी दवर्ली पंचायतीचे पंच हाजीर आशिल्ले.

नावेली हांगासरले दवर्ली वाठारांतल्या रेल्वे उड्डाण पुलाचो विशय आमदार तुयेंकार हांणी सांगिल्ले प्रमाण राज्यसभेंत मांडला. पूण प्रत्यक्ष ही सुवात पळोवंक नाशिल्ली. आतां हांगा कोंकण रेल्वे आनी दक्षीण अस्तंत रेल्वे अशा दोन विभागाचे रेल्वे ट्रॅक आसात. विद्युतीकरणाक लागून पुलाची उबारणी केल्यार उंचाय वाडटली. ताका लागून रेल्वे ट्रॅकाच्या दोनूय वटेनच्या सुवातेची गरज पडटली आनी भूंय संपादन करचें पडटलें अशें तानावडे हांणी म्हणलें.

आमदार उल्हास तुयेंकार हांचे सयत मुख्यमंत्री डॉ. प्रमोद सावंत हांची भेट घेतले. राज्य सरकारा कडल्यान भूंय संपादन आनी हेर प्रक्रियेंत सहकार्य लागपाचें आशिल्ल्यान मुख्यमंत्र्यांक हांगा हाडून पळोवणी करतले. कोंकण रेल्वेचे म्हायती प्रमाण दिसांतल्यान 82 फावटी दरवटो उडोवचो पडटा. उड्डाण पूल जायत जाल्यार लोकांचे सुरक्षीततायेचो प्रस्न सुटावो जातलो. हो खूब मोटो प्रकल्प आशिल्ल्यान राज्य आनी केंद्र सरकाराचेंय सहकार्य लागतलें. तंत्रीक गजाली, जमनी विशीचो विशय हो मुख्यमंत्र्यांचे भेटी उपरांतूच चालीक लागतलो अशेंय तानावडे हांणी म्हणलें.