भांगरभूंय | प्रतिनिधी
पालिका संचालकाक मेळून शुल्क फाटीं घेवपाची केली मागणी
पणजीः मडगांव पालिकेच्या गोवा फॉरर्वड पक्षाच्या नगरसेवकांनी मडगांव पालिकेच्या शुल्क वाडीचो विरोध केला. फकत १० ते १५ टक्के शुल्क वाड करपाचे पालिकेन निश्चीत केल्लें. मात पालिका संचालनालयान ह्या शुल्कांत १०० टक्के परस चड वाड केल्ल्यान वेवसायीक त्रासांत पडल्यात. देखून पालिका संचालकान हातूंत लक्ष घालून नगराध्यक्षांक ही वाड रद्द करपाक सांगची, अशी मागणी नगरसेवकांनी केल्या.
मडगांव पालिकेंतल्या नगरसेवकांच्या एक शिश्टमंडळ गोवा फोरर्वड पक्षाच्या फुडार्यां वांगडा पणजे पालिक संचालकाक मेळून तांकां हे विशीं निवेदन दिले. ह्या वेळार नगरसेवक रविंद्र नायक, लिंडन परेरा, फ्रान्सिस जोनेस, जुआंव क्रास्टो, पुजा नाईक, विक्टोरीया तावारेस वांगडा पक्षाचे उपाध्यक्ष दुर्गादास कामत आनी सरचिटणीस मोहनदास लोलयेंकार हजर आशिल्ले.
ह्या वेळार उलयतना नगरसेवक रवींद्र नायक हांणी सांगलें, मडगांव पालिकेन आपले बसकेंत १० ते १५ टक्के मेरेन शुल्क वाडोवपाचो थाराव घेतिल्लो. पूण उपरांत पालिकेन अधिसुचोवणी काडून हें शुल्क १०० टक्के परस चड वाडयलां.
धंदो करपी बारीक मनशाक ह्या शुल्काचो परिणाम जाला. लोक पालिकेंत येवन बोवाळ घालपाक लागल्यात. पयलींच्या दरा प्रमाण सायन बोर्ड शुल्क दर स्केअर मीटर रु. १०८० आशिल्लो. तो आतां देड हजार रुपया मेरेन पावला. जर आकारांत वाड जाली जाल्यार तो दोन हजारां मरेन पावता. फातोर्डा आनी मडगांवचे बारीक बहूजन समाजाचे लोक धंदो करतात तांकां हाचो मार बसला. व्हडले मॉल आसा तांकां हाचो कायच फरक पडना, मात बारीक मनशांक हे परवडचें ना, अशें नायक हांणी सांगलें.
मडगांव पालिके कडल्या पीडीए, पेट्रोल पंप आनी कोयर कराचे ३५ कोटी परस थकल्यात ते पयलीं मडगांव पालिकेन वसूल करचे. आतां वेवसाय शुल्क वाडयलां. कांय दिसांनी घर पट्टी कर वाडयतलो. आमी संचालकाकडेन हें शुल्क फाटीं घेवपाची मागणी केल्या आनी हाचेर अभ्यास करून निर्णय घेवपाचे उतर संचालकान दिलां, अशें नायक हांणी म्हणलें.
मडगांवचे लोक ह्या निर्णयाचेर खुश नात. पालिकेन २४ मार्चाक थाराव घेतिल्लो त्या वेळार नगराध्यक्षान सांगिल्लें, शुल्क १० ते १५ टक्क्यां मेरेन वाडटयलें. मात आतां हो दर १०० टक्के वयर वाडयला, अशें नगरसेवक आनी मडगांवचे आदले नगराध्यक्ष लिंडन परेरा हांणी सांगलें.
मडगांव आनी फातोड्डेंचे लोक त्रासांत पडिल्ल्यान हें शुल्क वाड फाटीं घेवपाची मागणी करपाक लागल्यात. जे बारीक लोक धंदो करतात तांचें शुल्क ४ हजारा वेल्यान १० हजारां मेरेन पावलां. हें शुल्क भरपाक तांकां परवडना देखून आमी सगळ्या नगरसेवकांनी निवेदन भेटोवन हें शुल्क उणें करपाची मागणी केल्या, अशें परेरा हांणी सांगलें.
जो कायदेशीर धंदो करता तांकां हें शुल्क वाडीचो परिणाम जातलो. जो कसलीच नोंदणी करीनासतना बेकायदेशीर धंदो करता ताका ह्या शुल्का पासत थाकाय मेळटा. देखून ह्या बेकायदेशीर धंद्याचेर लक्ष दिवपाची मडगांव पालिकेची गरज आसा. तुमच्या कर्मचार्यांक हे विशीं कारवाय करपाक लावपाक जाय. ओफिसांत बसून जे कोण कायदेशीर धंदो करतात तांचेर पेंच घालचो न्हय, असो सल्लो मोहनदास लोलयेंकार हांणी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
