दिल्ली कॅपिटल्साचें आनीक एक जैत

भांगरभूंय | प्रतिनिधी

अभिषेक पोरेल आनी लोकेश राहुल हांच्या अर्द शेंकड्यां नेटार दिल्ली कॅपिटल्सान लखनौ सुपर जायण्ट्साक 8 विकेटींनी हारायलो. लखनौन दिल्ली 160 धांवड्यांची मोख दिल्ली कॅपिटल्सान 17.5 ओव्हरींनी फकत 2 विकेटी व्हगडावन मेळयली.

ह्या जैता उपरांत दिल्ली आनी गुजरात टायटन्साचे समान 12 गूण जाल्यात. पूण, बरे नेट रनरेटीच्या आदाराचेर गुजरात पयले सुवातेर आसा.

अभिषेक आनी करुण नायर हांणी दिल्लीक बरी सुरवात करून दिली. करुणान कांय आकर्शक शॉर्ट मारले. पूण, चवथे अोव्हरींत मार्करमाच्या बॉलाचेर बोल्ड जालो. ताणें 9 बॉलांनी 15 धांवड्यो केल्यो. ते उपरांत अभिषेकान राहुला वांगडा मेळून डाव मुखार व्हेलो. पावर प्लेंत दिल्लीन 1 विकेट व्हगडावन 54 धांवड्यो केल्यो. 12वे ओव्हरींत अभिषेक 36 बॉलांनी पांच चवके आनी एक सक्याचे मजतीन 51 धांवड्यो करून बाद जालो. ताकाय लेगीत मार्करमान बाद केलो.

ते उपरांत राहुलान मुखेली अक्षर पटेला वांगडा मेळून स्कोर मुखार व्हेलो आनी आपल्या पंगडाक सोंपें जैत मेळोवन दिलें. अक्षरान 20 बॉलांनी चार सक्यांचे मजतीन नाबाद 34 धांवड्यो केल्यो. जाल्यार राहुलान 42 बॉलांनी नाबाद 57 धांवड्यो केल्यो.

ते आदीं टॉस हारल्या उपरांत पयलीं बॅटींग करपी लखनौ सुपर जायण्ट्साक एडेन मार्करम आनी मिचेल मार्श हांणी बरी सुरवात करून दिली. तांची विकेट घेवपाक दिल्ली कॅपिटल्साच्या बॉलरांक संघर्श करचो पडलो.

मार्करमान आक्रमक बॅटींग करून सेगीत दुसरो अर्द शेंकडो नोंदयलो. पूण, अर्द शेंकड्या उपरांत ताका अखेरेक 10वे ओव्हरींत दुश्मंता चमिरान बाद केलो. ट्रिस्टन स्टब्सान ताची कॅच धरली. मार्करमान 33 बॉलांनी 2 चवके आनी तीन सक्यांचे मजतीन 52 धांवड्यांची खेळी केली. ताणें मार्श वांगडा मेळून पयले विकेटी खातीर 87 धांवड्यांची भागिदारी केली.

दुसरे वटेन मार्श लेगीत आक्रमक बॅटींग करप चालूच दवरिल्ली. पूण, सध्या फॉर्मांत आशिल्लो निकोलस पुरनाक व्हड खेळी करपाक जमली ना. मिचेल स्टार्कान डावांतले 12वे ओव्हरींत 9 धांवड्यांचेर बोल्ड केलो. 14वे ओव्हरींत मुकेश कुमारान लखनौक दोन धपके दिले. पयलीं अब्दुल सामदाक (2) आपलेच बॉलिंगेचेर कॅच बाद केलो. ते उपरांत मुकेशान आक्रमक बॅटींग करपी मार्शाक बाद केलो. मार्शान 3 चवके आनी एका सक्याचे मजतीन 45 धांवड्यो केल्यो.

तो बाद जाल्या उपरांत डॅव्हिड मिलर आनी आयुष बडोनी हांणी डाव सांबाळपाचो यत्न केलो. पूण, दिल्लीच्या बॉलरांनी तांकां व्हड शॉर्ट खेळपा पसून आडावन दवरले. ताका लागून लखनौक धांवगती वाडोवपाक जमली ना. तरी अखेरचे ओव्हरींनी बडोनीन आक्रमक बॅटींग करपाचो यत्न केलो. पूण, ताका मुकेश कुमार बोल्ड केलो. बडोनीन 21 बॉलांनी 6 चवके मारून 36 धांवड्यो केल्यो. डावाचे अखेरच्या बॉलाचेर ऋषभ पंत लेगीत बाद जालो. अशे तरेन लखनौक निर्धारीत 20 ओव्हरींनी 6 विकेटी व्हगडावन 159 धांवड्यो करप शक्य जाल्यो. मिलर 14 धांवड्यो करून नाबाद उरलो.

दिल्ली वतीन मुकेश कुमारान चार ओव्हरींनी 33 धांवड्यो दिवन 4 विकेटी घेतल्यो. मिचेल स्टार्क आनी दुश्मंता चमिरा हांकां दरेकी एक विकेट फावो जाली.