भांगरभूंय | प्रतिनिधी
समाज घटमूट करतले तर पयलीं समाज साक्षरते कडेन पावोवपाची जापसालदारकी आंगार घेवंक जाय. समाजांत जीं दुबळेंपणा रिगल्यांत तीं ना करपाचो यत्न सातत्त्यान आनी प्रामाणीकपणान जावंक जाय.
एखादो समाज उबो जाता तो संस्थांच्या नेटाचेर. समाज संस्था जितल्यो खंबीर, सक्षम तितलो समाज भरभक्कम. समाजाच्या नांवान स्थापन जाल्ल्यो संस्था जेन्ना हातांत हात घालून वावर करता तेन्ना आपसकूच त्या समाजाची वेगळी अशी पारर्दशक घटना उबी जाता. घटने नुसार देवळां कितलीय आसूं, देव एक, मठ कितलेंय आसूं स्वामी एक, विचार कितलेंय आसूं निर्णय एक आनी पक्ष कितलेंय आसूं नेतो एक…! आपल्या समाजाची कास दरून चलपी समाज साक्षरते कडेन वता, समृद्धी कडेन पावता. आपल्याक जाय तें साध्य करपाक तांका बंद, उपोशण जांव कसले निवेदन दिवचें पडना, आपसकूच सगळे कशे तांच्या पदरात पडत वता. तत्वां आनी निश्ठा कोनश्याक मारून विस्कळीत जाल्ल्या स्वाभिमानशुन्य समाजाक मात आपलें हक्क, मागण्यो मान्य करपाक संघर्श करचो पडटा जसो हालीसराक म्हजो भंडारी समाज करता तसो.
मुळांत गोंयभर मोटे संख्येन शिंपडिल्लो भंडारी समाज हो खुब उंच पावंड्या वयलो आनी उदरगीच्या मार्गार पाविल्लो समाज. ह्या समाजांतल्या लोकां मदीं विद्ववत्ता आनी कुशळटाय दामून, चेपून भरल्या. स्वताच्या बळाचेर वेगळें अशे साम्राज्य उबें करपाची ताक तांच्या भुजांनी आसा, पूण मागासलेली अशी विचारसरणी आनी अंतरीक केस्तांवां, कलहाक लागून ह्या समाजातले जायते सक्रीय लोक नैतिक नदरेन जर्जर जाल्यात, दुरदिश्टी दवरून समर्पित भावनेन वावर करपी मनीस दुर्लक्षीत जाला आनी ह्या बोटा वयली निथू त्या बोटार काडपाची कळाशी आशिल्ले विचारसरणीच्या लोकां कडेन म्हजो भंडारी समाज बंदिस्त पडला.
आतांच्या ह्या गतीमान आनी स्पर्धात्मक युगांत भंडारी समाजाक रथाची न्हय तर मठाची खरी गरज आसा. मठाचे अनुयायी जशे स्वामीप्रती एकनिश्ट रावतात तशीच निश्ठा समाजांतल्या नेत्या प्रती राखप गरजेचें. उखल्ली जीब, लायली ताळ्याक ही वृत्ती आमकां घातक थारता. देव, धर्म, संस्कृती, धार्मीक गिन्यान आनी समाज्याप्रती कर्तव्यदक्ष रावपाची कला आत्मसात करप हे आमकां भोव गरजेचें. समाजांतल्या ल्हान- व्हड मनश्याक हांव भंडारी हाची जाणीव जावंक जाय. खरेंपणी समाजा मदीं जर परिवर्तन येवंक जाय जाल्यार हें गरजेचें.
समाज घटमूट करतले तर पयलीं समाज साक्षरते कडेन पावोवपाची जापसालदारकी आंगार घेवंक जाय. समाजांत जीं दुबळेंपणा रिगल्यांत तीं ना करपाचो यत्न सातत्त्यान आनी प्रामाणीकपणान जावंक जाय. आगांत आध्यात्म गुण आयलें जाल्यार तें शक्य आसा. बायल देव देव करता आनी दादलो खेंव घेता हातूंत म्हजो भंडारी समाज बदलचो ना.
भंडारी समाजात जें अश्टताशी लोक आसात, जांणी इतिहासाचीं पानां चाळ्ळ्यांत, तांचो समाजाचे माचयेर योग्य असो मान सन्मान जालो जाल्यार नवे पिळगेक बरो संदेश वतलो, तांच्या अणभवाचें कथन आयकून तांचें मन आनी मत परिवर्तीत जावन तांकां हांव भंडारी म्हूण सांगपाक गर्व दिसूं येता. ज्या समाजाक आपल्या इतिहासाचो विसर पडटा त्या समाजाचो फुडार काळखी आसता. म्हज्या भंडारी समाजाचे तशें जावंक फावना.
– सुनील दशरथ शिरोडकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
