भांगरभूंय | प्रतिनिधी
म्हजें मत
गोंय, दमण आनी दीव मुंडकार कायदो, 1975 संबंदीत प्रकरणांचो बेगोबेग निवाडो करपाचो यत्न गोंय सरकारान करचो. अधिकाऱ्यांनी अर्ज आनी कार्यवाही वेळार निवाडो करपाची खात्री करची आनी सर्वोच्च न्यायालयान सांगिल्ले प्रमाण प्रक्रिया बेगीन करपा खातीर म्हायती तंत्रज्ञान साधनांचो वापर करपाचो विचार करचो. ऑनलायन केस वेवस्थापन प्रणाली, डिजिटल दस्तावेज सांठो आनी डेटा विश्लेशण आनी अदमास विश्लेशणा खातीर एआय- सशक्त साधनां अशीं तंत्रज्ञान साधनां प्रक्रिया सुगम करपाक मेळटा. आसूं. सगलें कितें सरकाराचेर आदारून आसता.
मुंडकार कायद्याचोच अर्थ मुंडकार भौसाक सुटका दिवपाक पुरो. पूण कायदो चालीक लावपाक सरकार गंभीर आसूंक जाय. एके वटेन मुंडकार प्रकरणांक कित्याक कळाव जावपाक लागला? जंय ह्या प्रकरणांत विरोधी पक्ष वा हेर कसलोच हस्तक्षेप ना? मुंडकार दावेदारांक सरकारान एकतर्फी आदेश दिवचे. मुंडकारा कडेन संबंदीत सगळीं कागदपत्रां ताचे कडेन आसतना दावेदाराक मुंडकार जाहीर करपांत कितें चूक? दावेदारांक रोखडीच सुटका मेळोवपा खातीर कायद्याचो तर्क पाळचो.
देखीक एक मुंडकार, फाटलीं 6- 7 वर्सां मुंडकार कायद्या खाला 50 ते 60 चौखण मिटर जमनीचो दावो करता. अजूनय तो झगडटा आनी तेंय विरोध नासतना. हाचे आदीं केस झगडपी ताच्या बापायक मरण आयलें. मुंडकार प्रकरणांची स्थिती सरकाराक खबर आसा काय? प्रलंबीत प्रकरणांचो आंकडो पळोवन फुडारी समाधानी दिसतात. इतलेंच? मुंडकार प्रकरणां कित्याक प्रलंबीत आसात हाची चवकशी सरकारान करची. उण्यांत ,उणीं मुंडकार प्रकरणां जंय प्रतिवादी नात, तांचो बेगीन निवाडो करचो. भाटकार केशिक येनात ,थंय उशीर कसलो?
राजेश बाणावलीकार्,
वेगासवाडो, हडफडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
