भांगरभूंय | प्रतिनिधी
पेडणें: न्हंयबाग, पोरस्कडेंच्या भगवान उत्तम कासकार हांकां सातारा मध्यानरातीं आपघात जावन मरण आयलें. हाका लागून न्हंयबाग- पोरस्कडें वाठारांत दुख्खाचें वातावरण पातळ्ळां.
भगवान हांचो वीस तारखेर वाडदीस. तें निमतान शिर्डी साईबाबाचें दर्शन घेवचें आनी पुराय कुटुंबा खातीर आशिर्वाद घेवचे खातीर भगवान आपल्या तीन इश्टां सयत १९ तारखेर शिर्डीच्या प्रवासाक भायर सरलो. १९ तारखेर रातच्या ११ :३० वरांचेर सातारा एका रस्त्या कुशीकच्या हॉटेलांत ते सगले जेवले. थंयच वाडदिसाची केकूय कापलो. उपरांत ज्या हॉटेलाच्या रस्त्या कुशीक तांणी आपलें वाहन पार्क केल्लें त्या वाहना कडेन वतना एक ट्रॉली वेगान आयली. ते ट्रॉलीन पयलीं एका लायटीच्या खांब्याक धपको दिलो. खांब्याक धपको दिनाफुडें ती ट्रॉली उमथली तेन्ना भगवान कांसकार ट्रॉली पोंदा चिड्डलो. हातूंत ताका जाग्यारूच मरण आयलें. मात ताचे वांगडा आशिल्ले हेर तीग इश्ट वाटवले. सांतारा पुलिसांनी घडणुकेचो पंचनामो केलो.
पोरस्कडें न्हंयबाग वाठारांत हे घडणुके विशीं कळटांच कासकार कुटुंबाचेर दुख्ख कोसळ्ळें. भगवान हो रेंव वेवसायांत बारीक सारीक कामां करतालो. चार भयणी आनी हो एक ल्हान भाव ह्या कुटुंबाचो आदार आशिल्लो. मात ताचेर काळान घालो घालो.
मजगतीं, सोयरीं भगवान हांची कूड ताब्यांत घेवपा खातीर २० तारखेर सातारा पावलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
