भांगरभूंय | प्रतिनिधी
न्यूयॉर्क, खबरां संस्था: अमेरिकेचे राष्ट्राध्यक्ष डोनाल्ड ट्रम्प हांच्या धोरणां आड शेनवारा परत हजारांनी निदर्शक रस्त्यार देंवले. हीं निदर्शनां सगल्या ५० राज्यांनीय जालीं. ट्रम्प हांच्या टेरिफ वॉर धोरणां आड आनी सरकारी नोकर्यांच्या कपाती आड निदर्शनां जातात.
ह्या वेळार, निदर्शक राष्ट्रपतींचें घर, व्हायट हाऊसा भोंवतणी येवन रावले. लोकांनी ट्रम्पचेर सभ्यता आनी कायद्याचें राज्य चिडि्डल्ल्याचो आरोप केलो. हे चळवळीक ५०५०१ अशें नांव दिलें. हाचो अर्थ ’५० निशेध, ५० राज्यां, १ आंदोलन’ असो आशिल्लो.
व्हायट हावजा वांगडा, निदर्शकांनी टेस्ला शोरूमा कडेन निदर्शनां व्हेलीं. ट्रम्प हांचे आड निदर्शनांचो हो दुसरो टप्पो. ह्यान पयलीं ५ एप्रिलाक देशभर ट्रम्प हांचे आड निदर्शनां जाल्लीं.
ट्रम्प आनी मस्क हांच्या धोरणां आड निदर्शनां
राजधानी वॉशिंग्टन डीसी सयत सगल्या राज्यांनी जावपी निदर्शनांचें मुखेल कारण म्हळ्यार राष्ट्राध्यक्ष डोनाल्ड ट्रम्प आनी उद्देगपती एलन मस्क हांचीं भिरांकूळ धोरणां. एलन मस्क हांचो कार्यक्षमता विभाग सरकारी विभागांत सेगीत कपात करता.
आतां मेरेन हजारांनी सरकारी कर्मचार्यांक तांच्या कामावेल्यान काडल्यात. दुसरे कडेन, स्थलांतरितां आड कारवाय करपाचे आनी हेर देशांचेर शुल्क घालपाचें डोनाल्ड ट्रम्प हांचें खर धोरण हेंय ह्या निदर्शनांचें एक मुखेल कारण.
ट्रम्पच्या टेरिफ वॉराक लागून हेर देशांतल्यान अमेरिकेंत येवपी वस्तूंचें मोल वाडलां. हाचो सरळ परिणाम सामान्यांच्या बोल्साचेर जावपाक लागला.
४५% मतदार ट्रम्प हांच्या कामाचेर खूश
अमेरिकन सर्वेक्षण एजन्सी गॅलपच्या मतान, ४५% अमेरिकन मतदार ट्रम्प हांच्या पयल्या ३ महिन्यांतल्या कामाचेर समाधानी आसात, जाल्यार फकत ४१% मतदार ट्रम्प हांच्या पयल्या कार्यकाळांतल्या, पयल्या ३ म्हयन्यांतल्या कामाचेर समाधानी आशिल्ले.
जरी हें हेर राष्ट्रपतींचे तुळेंच बरेंच उणें आसा. १९५२ ते २०२० मजगतींच्या सगल्या राष्ट्रपतीं खातीर सरासरी पयल्या तीन म्हयन्यांची मान्यताय रेटिंग ६०% आसा. ते तुळेंत, ट्रम्प हांचें रेटिंग उणें आशिल्ल्याचें दिसून येता. एजन्सीच्या मतान, ट्रम्प हांणी पदभार स्वीकारलो तेन्ना तांचें रेटिंग ४७% आशिल्लें. हातूंतय उणाव नोंद जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
