भांगरभूंय | प्रतिनिधी
पणजी ः बायलांक सर्व्हायकल कॅन्सर जावपाची चड शक्यताय आसता. सद्या एचपीव्हीची प्रतिबंधात्मक लस उपलब्ध आसा आनी ताची येसस्वी चांचणी जाल्या. ते खातीर हे वाशिनां विशीं कसलोच गैरसमज करचो न्हय अशें मुख्यमंत्री डॉ. प्रमोद सावंत हांणी सांगलें. शेनवारा पणजेच्या रोटरी क्लबान आयोजीत केल्ल्या फुकट लसीकरण कार्यावळींत ते उलयताले. ह्या वेळार डॉ. केदार फडते, डॉ. वंदना धुमे, गौरीश धोंड आनी हेर पदाधिकारी हाजीर आशिल्ले.
कोविड लसीकरणा वेळार चुकीचे समज निर्माण जाल्ले. आतां कांय जाणांक सर्व्हायकल कॅन्सराच्या वाशिना विशीं गैरसमज जाला अशें मुख्यमंत्र्यान सांगलें. ह्या वाशिनाचें काम समजून घेनासतना तें विशीं चुकीचे समज पातळायतात. वाशीन घेतल्ल्यार कितें तरी जातलें अशें म्हणटात. पूण हें चुकीचें आसून वेगवेगळ्या दोतोरांनीय हें वाशीन सुरक्षीत आसा अशें सांगलां.
हें वाशीन एकदम बरें अशें केंद्र सरकारान स्पश्ट केलां. फुडाराक केंद्र सरकाराच्या भलायकी उपक्रमांत तें वाशीन आस्पावतलें. केंद्रान त्या वेळार तें फुकट दिवपाची येवजण आंखल्या. आदल्या काळांत जायत्या जाणांक पोलियो जातालो. पूण लसीकरण मोहिमेक लागून भारत आतां पोलियो मुक्त जाला. तेच प्रमाण आतांच सर्व्हायकल कॅन्सरा खातीर लसीकरण सुरु केल्यार फुडल्या कांय वर्सांत एकल्याक पसून हें दुयेंस जावचें ना. देखून हे विशीं कसलोच गैरसमज करून घेनासतना वाशीन घेवप गरजेचें आसा.
जिबेचेर नियंत्रण दवरचें
भलायकी बरी दवरपा खातीर लसीकरण म्हत्वाचें. पूण नेमान व्यायाम आनी योग्य आहार घेवप हेंय तितलेंच म्हत्वाचें. भायले जंक फूड खाल्यार जायतीं दुयेंसां जावपाची शक्यताय आसता. देखून जिबेचेर नियंत्रण दवरप गरजेचें अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
