भांगरभूंय | प्रतिनिधी
पणजी ः पेडण्यां-खाजनें नेण्टे दलीत चलयेक मारपेट केल्ल्या प्रकरणांत पुलिसांनी समीर कोरगांवकार हाका भेडशी-सिंधुदुर्गांत अटक केली. ह्या प्रकरणांत कागाळ नोंद जाल्या पसून दुबावित फरारी आशिल्लो.
प्रकरण कितें?
मेळिल्ले म्हायती प्रमाण, 14 एप्रीलाक सांजवेळार दुबावीत आरोपी समीर कोरगांवकार खाजनें सावन दुचकी वेल्यान वतालो तेन्ना उरफाटे दिकेन येवपी पिडित चलयेची दुचाकी ताचे कुशीकच्यान आयली. ताका लागून दोगांय मदीं शाब्दीक वाद जालो. उपरांत दुबावित चलयेचेर धांवून गेलो आनी तिचें टी-शर्ट धरुन जाती वयल्यान तिका उतरां वापरून तिचो विनयभंग केलो अशी कागाळ आसा. चलयेच्या आवय-बापायन पुलीस स्टेशनांत रितसर कागाळ दाखल केल्या.
मजगतीं, योग्य वेळार कारवाय जावंक नाशिल्ल्याचो उल्लेख करून पेडणें पुलीस उपनिरिक्षक लक्ष्मण देसाय हांकां रिझर्व्ह पुलीस विभागांत हाजीर रावपाचे निर्देश दिल्ले. तशेंच उपअधीक्षक ब्राझ मिनेझिस हांकां दोन दिसां भितर चवकशी अहवाल सादर करपाची सुचोवणी दिली.
मजगतीं, उपअधीक्षकान तपास गतीन करुन समीर कोरगांवकार हाका भेडशी- सिंधुदुर्गांत ताब्यांत घेतलो आनी रोखडीच ताका रितसर अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
