भांगरभूंय | प्रतिनिधी
केंद्रा कडल्यान मुजतवाड ना; 5 ते 10 टक्के काम उरलां
भांगरभूंय । प्रतिनिधी
पणजी : केंद्र सरकारान दिल्ली 15 दिसांची मुजतवाड सोंपिल्ल्यान पशुपालन आनी पशुसंवर्धन खात्या वतीन सुरू जाल्ली रस्ताद आनी पोशिल्ल्या सुण्यांची मेजणी बंद केल्या. गोंयांत अजून लेगीत अश्या सुण्यांचे मेजणेचें काम 5 ते 10 टक्के उरलां. केंद्रान मुजतवाड दिताच मेजणी सुरू करतले, अशी म्हायती संचालक डॉ. नितीन नायक हांणी ‘भांगरभूंय’ कडेन उलयतना दिली.
गोंयांत रस्ताद सुण्यांची संख्या व्हड प्रमाणांत वाडत आसा. तातूंत कांय जाणां कडेन हिंस्र जातींची सुणीं अजून आसात. हिंस्र जातींच्या सुण्यांनी केल्ल्या हल्ल्यांत हे आदीं खूब जाणांचे बळी गेल्यात. आतां बिरेस्तारा फोंड्यां एका अडेज वर्सांचे चलयेक रस्ताद सुण्यांच्या हल्ल्यांत मरण आयिल्ल्याचें मुखार आयलां. अशे प्रकार आडावपा खातीर आनी रस्ताद सुण्यांचेर उपाय आंखपा खातीर केंद्र सरकारान गोंया सयत सगल्याच राज्यांक पोशिल्ल्या आनी रस्ताद सुण्यांची मेजणी करपाचे निर्देश दिल्ले. ते प्रमाण पशुपालन आनी पशुसंवर्धन खात्यान कांय म्हयन्यां आदीं हें काम सुरू केलें. सुरवेक हे मेजणे खातीर 30 एप्रील मेरेनची मुजत दिल्ली. ते उपरांत तातूंत 15 दिसांची वाड करून 15 एप्रील मेरेन मुजतवाड दिली. तरी लेगीत गोंयांत मेजणेचें काम 5 ते 10 टक्के उरलां, पूण केंद्रान परतून आनीक मुजतवाड दिवंक नाशिल्ल्यान हें काम बंद केलां, अशें डॉ. नायक हांणी सांगलें. मजगतीं, पोशिल्ल्या आनी रस्त्याद सुण्यांचें मेजणेचें काम पुराय जावंक नाशिल्ल्यान गोंयांतल्या सुण्यांचो आंकडो मुखार येवंक ना. हे मेजणे उपरांत रस्ताद, पोशिल्ल्या आनी हिंस्र ह्या तीन प्रकारांतल्या सुण्यांची संख्या मुखार येतली, अशेंय डॉ. नायक हांणी स्पश्ट केलें.
रस्ताद सुण्यांचेर नियंत्रण दवरपाची जापसालदारी थळाव्या संस्थांची: डॉ. नायक
रस्ताद सुण्यांचेर नियंत्रण तशेंच तांचो बंदोबस्त करपाची जापसालदारकी कायद्या प्रमाण पंचायत, पालिका या थळाव्या संस्थांची आसा. सुण्यांचें निर्बिजीकरण तशेंच येवजणे खातीर निधी दिवपाची जापसालदारी पशुपालन आनी पशुसंवर्धन खात्याची आसा. रस्ताद सुण्यांचेर नियंत्रण दवरपा खातीर गोंय जनावरा वेवस्थापन येवजण आसा. हे येवजणे खाला निधीची तजवीज आसा. येवजण खात्याची आसली तरी कार्यवाहीची जापसालदारकी थळाव्या संस्थांची आसा. सुण्यांच्या निर्बीजीकरणा खातीर लेगीत पंचायत/ पालिकां कडल्यान खात्या कडेन प्रस्ताव येवचो पडटा, अशें संचालक डॉ. नितीन नायक हांणी सांगलें.
दर्यादेग वाठारांत रस्त्याद सुण्यांचें धुमशेण
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
