भांगरभूंय | प्रतिनिधी
पणजी : याचिकादाराक म्हायती दिवपाक कळाव केल्ल्यान ताचो वेळ, शक्त आनी पयशेय खर्च जाले. हाची भरपाय म्हणून मागिल्ली म्हायती दिवपा वांगडा १० हजार रूपयांची लुकसाण भरपाय याचिकादाराक दिवपाचो आदेश मुखेल म्हायती आयुक्त (सीआयसी) अरविंदकुमार नायर हांणी वास्तुशिल्पकला महाविद्यालयाक (आर्किटेक्चर कॉलेज) दिलो. ह्या आदेशाक लागून याचिकादार रॉय डिसोझा हांकां थाकाय मेळ्ळी.
रॉय डिसोझा हांणी वास्तुशिल्पकला महाविद्यालयाच्या म्हायती अधिकार्यां कडेन (पीआयओ) निशा सुआरीस सायत हेर कर्मचार्यांची हजेरी, नियुक्त्यां विशीं म्हायती हक्क कायद्या खाला म्हायती मागिल्ली. तांणी ही म्हायती १५ जानेवारी २०२१ दिसा मागिल्ली. दिल्ली म्हायती समाधानी नाशिल्ल्यान तांणी एफएएकडेन (फर्स्ट अपीलीट ऍथोरीटी) पयली अपील सादर केली. एफएएच्या आदेशा उपरांतूय समाधान जावंक नाशिल्ल्यान म्हायती आयोगा कडेन तांणी दुसरी अपील (याचिका) सादर केली. ही याचिका निकालांत काडटना मुखेल म्हायती आयुक्तांक १० हजार रूपयांची लुकसाण भरपाय दिवपाच्या आदेशा सयत म्हायती दिवपाचो आदेश दिला.
रॉय डिसोझा हांणी वीजीटींग फॅकल्टी सयत हजेरीपटाची फायल पळोवपा खातीर मागिल्ली. बायोमेट्रिक मशिनाचेर नोंद जाल्लो वेळूय तांणी मागिल्लो. तशेंच २०१८नंतर वीजीटींग फॅकल्टीची विशया सयत नियुक्त्यांचीय सविस्तर म्हायतीय मागिल्ली. तशेंच तेन्नाचे प्राचार्य आशिष रेगे हांचे व्यक्तीगत फायलीचीय मागणी केल्ली. हजेरी तशेंच वीजीटींग फॅकल्टीच्या नियुक्त्यांची म्हायती दिली, मात पळोवपा खातीर फायल्स दिवंक ना. हाका लागून रॉय डिसोझा हांणी पयलें अपील दाखल केलें. पयल्या अपीलांत प्रतिवादी आशिल्लो एक म्हायती अधिकारी होच एफएए आशिल्ल्यान तांणी सुनावणेक सुरवात केली. प्रतिवादी आशिल्ल्यान तांणी एफएए (फस्ट अपीलीट ऍथोरिटी) म्हणून दुसर्या अधिकार्याची नियुक्ती करप गरजेचें आशिल्लें. तरीय सुनावणी जाली. उपरांत एकाच वेळार प्रतिवादी आनी न्यायाधीश जावपाक शकना, अशें म्हणून एफएए आशिल्ले प्राचार्यांनी सुनावणेंतल्यान फाटीं सरयले. हाका लागून याचिकादाराना म्हायती आयोगाकडे दुसरें अपील (याचिका) दाखल केलें.
हजेरीपटाच्यो प्रमाणीत प्रती १० दिसांनी याचिकादाराक दिवच्यो. तशेंच दिनेश सरीन हाच्या नियुक्तीपत्राची प्रत याचिकादाराक दिवची. महाविद्यालयांत प्रत नासल्यार लेखा संचालनालयाकडेन प्रत दिवपा खातीर १५ दिसां भितर अर्ज करचो. प्रत मेळटांच ती याचिकादाराक दिवची. तशें याचिकादाराचो वेळ आनी शक्त खर्च जाल्ल्यान १० हजार रूपयांची लुकसाण भरपाय दिवची असो आदेश सीआयसी अरविंदकुमार नायर हांणी दिलो. वास्तुशिल्पकला महाविद्यालयाच्या पीआयओंक ८ मे २०२५ मेरेन कार्यवाही अहवाल दिवपाचेंय आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
