भांगरभूंय | प्रतिनिधी
पणजी : कला अकादमींत ‘पुरूष’ नाटकाच्या प्रयोगा वेळार लायटी पिकपिकाचो प्रकार हो तंत्रीक इबाडाक लागून जालो. कला अकादमीचे कर्मचारी वा तंत्रज्ञांचो दोश ना. शरद पोंक्षे हांणी जे आरोप केल्यात ते चुकीच्या म्हायतीच्या आदाराचेर केल्यात. आपले बदनामीची कांय जाणानी सुपारी घेतल्या आसुंये, अशें कला आनी संस्कृती खात्याचे मंत्री गोविंद गावडे हांणी सांगलें.
कला आनी संस्कृती खात्याचे मंत्री गोविंद गावडे हांणी कला अकादमींत पत्रकार परिशद घेतली. ह्या वेळार वांगडी सचीव अरविंद खुटकार आनी वेवस्थापक सुशांत नायक हाजीर आशिल्ले. आयतारा 13 एप्रीलाक ‘पुरूष’ नाटकाचो प्रयोग दनपारां 3.37 वरांचेर सुरू जालो. 4.40 वरांचेर लायटी पिकपिकपाक (फ्लिकरींग) लागल्यो. ह्या वेळार लायट ऑपरेटर तशेंच हेर तंत्रज्ञांनी ही समस्या पयस करपाचे यत्न केले. स्टेजीचेर सेटअप आशिल्ल्यान आनी नाटक चालू आशिल्ल्यान दोश पयस करप शक्य नाशिल्लें. हॅलोजन लायटीच्या आदारान फुडें प्रयोग सुरू जालो. कला अकादमीची लायटीची यंत्रणा एलईडी लायटीचेर आदारीत आसा. सगळ्यो लायटी सर्किटान चेनीन एकामेकाक जोडल्यात. ब्लायंडर लायटीन दोश आशिल्ल्यान लायटी पिकपिकपाक लागल्यो. दुसऱ्या दिसा कला अकादमीच्या तंत्रज्ञांनी हो दोश पयस केलो. पुरूष नाटकाच्या दुसऱ्या दिसा सोमारा आंबेडकर जयंती निमतान कार्यावळ जाली, अशें मंत्री गावडे हांणी सांगलें.
उजवाड यंत्रणेचो दर्जो वाडयतले
भौशीक बांदकाम खात्याच्या कंत्राटदारान लायटींग यंत्रणेचें काम केलां. डिफेक्ट लायबिलीटी कालावधी आशिल्ल्यान ताचे कडल्यान दुरुस्ती करची पडटा. लायटींग यंत्रणेंतले दोश पयस करपाक भौशीक बांदकाम खात्याक सांगलां. कृती दळ आनी कलाकारां कडल्यान सुचोवण्यो घेवन लायटींग (उजवाड) यंत्रणेचो दर्जो वाडयतले.
तशेंच बॅकपा खातीर टंगस्टन फिलामेंट लायटींग यंत्रणा बसोवपाचो निर्णय कला अकादमीन घेतला. हाका लागून आप्तकालीन स्थितींत हे यंत्रणेचो वापर करप शक्य जातलें.
शरद पोंक्षे चुकीचे उलयले : गावडे
शरद पोंक्षे हे चुकीचे उलयतात, चुकीच्या लोकांच्या नादाक लागतात, अशी प्रतिक्रिया मंत्री गोविंद गावडे हांणी पत्रकार परिशदेंत उक्तायली. लायटी पिकपिकपाक लागल्यो तेन्ना कला अकादमीचे तंत्रज्ञ आशिल्ले. तांणी दोश पयस करपाचे यत्न केले. कला अकादमीचे तंत्रज्ञ नाशिल्ल्याचें जें विधान शरद पोंक्षे हांणी केलां, तें चुकीचें आसा. कला अकादमीच्या विशयाचेर खूब जाण आपली बदनामी करतात, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
